Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 248,055 Auteur: Guiraut Riquier Genre: Vers Numero: XXVIII

Mentaugutz

I	1	Mentaugutz
		auch que Dieus es
	3	e crezutz
		que de totz bes
		es la lutz,
	6	e que·l mon fes,
		e que nutz
		per nos mort pres,
	9	e del vas
		ressors, de mort
		per qu’estort
	12	son e seran peneden
		tuch li veray peneden.
II		Mas tan len
	15	es bes volgutz,
		e corren
		mals e saubutz,
	18	qu’en parven
		non es temsutz
		Dieus, que ren
	21	meritz degutz.
		So es mes
		denant detras,
	24	per qu’em ras
		de dreg camj e de port
		e perillam ab deport.
III	27	Qu’om fa tort
		dreg conoyssen,
		per que port
	30	autruy soven
		a vil sort,
		lo sieu perden;
	33	e·l pus fort
		son pus arden,
		per qu’es brutz
	36	qu’amors ni fes
		ni merces
		no son, q’usquecx a mal pas,
	39	per que venem a mal pas.
IV		Doncx tu, las
		senes acort,
	42	que·t faras
		ajas recort;
		que trop as
	45	estat el ort
		et auras
		so que·t remort
	48	fach ab sen,
		no sias mutz
		quon avutz
	51	yest; de ben —cofes, repres—
		fai, que no sias repres.
V		Dieus cortes
	54	que vols e fas
		drech, qu’iest ples
		de gauch, a bras
	57	pren nostres
		faitz, no·n dan pas;
		del sotzmes
	60	vil loc trop bas
		ses conort
		totz bes fazen
	63	nos defen,
		senher, e lai nos perdutz
		on non es lunhs bes perdutz.
VI	66	Belh Deport
		ayc mout valen
		e plazen,
	69	e no·l puesc mandar salutz;
		mas Dieus li sia salutz.
VII		Per saber suy esperdutz,
	72	quar vey que tant es perdutz.