Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 167,033 Auteur: Gaucelm Faidit Genre: Canso Numero: 10

L'onratz, jauzens sers

I	1	L'onratz, jauzens sers
		On ab bella parvensa
		Venc mos Bels-Espers
		Gen complir m'atendensa,
	5	Mi torn'en plazers
		Ab doussa sovinensa
		E·m fai chansos faire,
		Don mi cujav'estraire ;
		Car ben es razos
	10	Q'ieu chant gais e joios,
		Pois cill, cui sui amaire,
		Qu'es la genser c'anc fos,
		Vol me e mas chansos.
II		Qe·l sieus gentils, pros
	15	Cors cortes, de bon aire,
		Francs e cars e bos,
		Humils e d'aut afaire
		E l'huoill amoros
		Que·m saubro·l cor attraire
	20	Vas sa benvolensa,
		Don soplei vas Proensa,
		M'an tan aut aders
		Que rics sui et enders,
		Sol nostra covinensa
	25	Si'acomplitz lezers,
		Que no·i failla poders.
III		Car adreitz sabers
		E valens conoissensa
		Et humils parers
	30	E pretz ab gran valensa,
		Honratz gens teners
		Son en lieis, don m'agensa,
		E'n sui gais chantaire
		Per sa valor retraire
	35	E·il grazisc los dos
		E·ls plazers saboros
		E l'afan, qe·il vi traire
		Al greu comjat, doptos,
		De sospirs angoissos.
IV	40	Per so·il taing perdos
		Car tarziei pauc ni gaire
		De tornar coitos
		Ves lai dins son repaire,
		Don de genoillos
	45	Li sui leials prejaire
		Que merces la·m vensa
		E·m perdon la faillensa ;
		C'onrars ni jazers
		Ni baizars ni plazers
	50	No·m ten sai ni bistensa.
		Doncs no·il sia temers
		Qe·is camje mos volers !
V		Pero si·l movers
		Q'ai faich per penedensa
	55	Lai on Dieus lo vers
		Pres veraia naisensa,
		L'es al cor dolers,
		No·il deu aver temensa ;
		C'a tot bon vejaire
	60	Es dels bos pretz lo maire
		Qui sans, deleitos
		Vai al rei glorios
		Servir, qu'es vers salvaire;
		Car el cel e sa jos
	65	L'en ve ries guizerdos.
VI		Oimais es sazos
		D'anar am Dieu lo paire ;
		Qi pres mort per nos,
		Si'a nos chapdelaire,
	70	Ez als compaignos,
		Qi son nostre cofraire
		Per obedienza,
		Aid er en lor crezensa
		E·ls cors e·ls avers,
	75	Car es sos servirs ders,
		Teinha en sa prezenza,
		E·il sia douz vezers
		L'afanz dels mals poders !
VII		Na Maria, vos
	80	Etz tant bella e pros
		Qe non es emperaire
		El mon que molt non fos
		Onratz pels vostres dos.