Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 248,061 Auteur: Guiraut Riquier Genre: Vers Numero: XXX

Ops m'agra que mos volers

I	1	Ops m’agra que mos volers
		s’acordes ab m’entendensa,
	3	ab sen et ab conoyssensa,
		per que·s complis mos espers;
		mas no·l puesc apoderar,
	6	ans me fa forssat passar
		soven otra mon dever,
		ab pezar o ab plazer.
II	9	E say que per los plazers
		va mos cors a dechazensa;
		dels pezars port malvolensa
	12	e·l tot esme non-devers;
		e per lo voler blasmar
		no·m puesc ab Dieu escuzar,
	15	quar razos ab bon saber
		deu en tot penre poder.
III		Mas non es tals mos poders
	18	que soven volers no·l vensa
		per esper de penedensa;
		et aquo non es sabers,
	21	quar mans ne fa trabucar
		mortz en aquelh esperar
		que non an plenier lezer,
	24	et aquo devem temer.
IV		En Dieu sia mos temers
		e ma fes e ma crezensa,
	27	e don me tal pacïensa
		que patz sia mos lezers,
		e·l puesca ferms adorar
	30	e lauzan glorificar
		ses d’esperansa cazer,
		ab fin que·m denh retener.
V	33	Quar sos honratz reteners
		es de totz plazers creyssensa,
		e vida ses defallensa
	36	don temor no fa cazers,
		e gaugz ses als dezirar.
		Doncx elh, que sols o pot far,
	39	nos don en luy tal esper
		que als no puscam voler.
VI		Ses tu, vers Dieus, aizinar
	42	no·ns podem de lunh ben far:
		donc fai nos via tener
		que vivam al tieu plazer.
VII	45	Maires de Crist, ton filh car
		prega per nos, que·ns ampar
		e que·ns garde de cazer
	48	a la fin en desesper.