Kolsen, Adolf. Trobadorgedichte: Dreissig Stücke altprovenzalischer Lyrik. Halle: Max Niemeyer Verlag, 1925

[CdT en procés d'incorporació]

Code: 231,001 Auteur: Guillem Rainol d'At Genre: Tenso Numero: 17

Auzir cugei lo chant e·l crit e·l glat

I	1	Auzir cugei lo chant e·l crit e·l glat,
		Que fan l'auzel, qan son vert li plaissat.
		Aital fer'eu ; mas per sa voluntat
		Ma dona·m dis car, de lleis cambiat,
	5	Quar anc creziei moiller de son vezin.
		Ja Dieus non sal don Rainier l'afillat,
		S'anc l'en menti, pois fo en s'amistat !
		Enanz l'am mais que peis en romanin.
II		Seingner, son nas volri'agues taillat,
	10	Qui vos a dig qu'e·us aia enantat.
		C'aissi fos solt'e monda de peccat
		Con sui de cel, de cui es adalbat,
		Si tot port'arc e coutel barbarin !
		Pens e repens e quant n'ai ben pensat !
	15	Puosca saber don si'espermentat ;
		Mas s'a puta color de Sarrazin.
III		Domna, tostemps vos aurai castiat,
		Non disesses follia ni viutat.
		Aquest'es ric'e de gran parentat
	20	Et a marrit bon vassal estrunat ;
		Qu'eu li ai vist caval outramarin,
		Et es saubut en feir'o en mercat :
		Genser de leis non debana fillat
		E met vos i Cavelc e Venassin.
IV	25	Seingner, per Dieu, be n'ai mon cor irat,
		Quar a·l sieu ling contral mieu azesmat ;
		Qu'eu sui plus ric'e de major barnat
		Et ai trop mais de lan'o de fillat.
		E pois ai bon cavallier a pairin
	30	E no·us tengatz ges a re gast', en At ;
		Qu'e·us ai cubert en lansol bugadat,
		Que era totz ces estandiers de lin.
V		Domna, ben sai que·us er guizardonat
		Qu'om no·i es mes en bassac pertussat !
	35	Si malgoires m'aguesson ajudat,
		Espeil n'agras e bon conrei pinsat
		E quabeillier', ab que·us tengessa crin.
		Pois disseran tuit li plus envezat :
		„Quals es aquist ?" qant vos vengras d'orat,
	40	„Ben, vos plevisc, bell', amest sobrefin !"
VI		Seingner, tostemps ai dig e mon orat
		Que venguesses, quant er escudelat.
		Qu'eus er'ensencha ! C'avi'encargat ?
		Quant enpugiei sus el bari merlat
	45	Et en quazic malaut'en un coisin,
		Eu conuc ben con n'avias peccat
		E fui dolent'ab vos. Per amistat
		Aqui mezeis fis vos en bona fin.
VII		Domna, ben fon saubut et azalbat
	50	Lo luns mati com fes la caritat ;
		Quant portest guans e borsa de cendat,
		A las meillors aguest lor pretz baissat
		Que tot un jorn n'esteron al latin.
		Si fossetz lai, on vos fon destinat,
	55	Foratz al bois part Sancta-Trinitat,
		Al port de Sorc, en terra de sanguin !