Zenker, Rudolf. Zu Folquet von Romans und Folquet von Marseille. "Zeitschrift für Romanische Philologie", 21 (1897), pp. 335-352

Code: 156,015 Auteur: Falquet de Romans Genre: Alba religiosa Numero: XV

Vers dieus, el vostre nom e de sancta Maria

I	1	Vers dieus, el vostre nom e de sancta Maria
		m'esvelharai hueimai, pus l'estela del dia
		ven daus Jerusalem, que m'ensenha qu'ieu dia:
		estatz sus e levatz,
	5	senhor que dieu amatz,
		que·l jorns es aprosmatz
		e la nuech ten savia;
		e sia·n dieus lauzatz
		per nos et adoratz,
	10	e·l preguem que·ns don patz
		a tota nostra via.
		La nuech vai e·l jorns ve
		ab clar cel e sere,
		e l'alba no·s rete,
	15	ans ven belh’e complia.
II		Senher dieus que nasques de la verge Maria
		per nos garir de mort e per restaurar via
		e per destruir’enfern que·l diables tenia,
		e fos en crotz levatz,
	20	d'espinas coronatz
		e de fei abeuratz,
		senher, merce vos cria
		aquestz pobles onratz,
		que·lh vostra pietaz
	25	lor perdon lor peccatz;
		amen, dieus, aissi sia.
		La nuech vai e·l jorns ve
		ab clar cel e sere
		e l’alba no·s rete,
	30	ans ven belh’e complia.
III		Qui no sap dieu pregar, obs es que o aprenda,
		et auja qu'ieu dirai, et escot et entenda:
		dieus, que comensamens es de tota fazenda
		laus vos ren e merce
	35	del amor e del be
		que m'avetz fach ancse
		e prec, senher, que·us prenda
		granz pietatz de me,
		que no·m truep ni·m malme
	40	ni m'engane de re
		diables, ni·m surprenda.
		La nuech vai e·l jorns ve
		ab clar cel e sere
		e l’alba no·s rete,
	45	ans ven belh’e complia.
IV		Dieus, donatz mi saber e sen ab qu'ieu aprenda
		vostres sanhs mandamens e·ls auja e·ls entenda,
		e·l vostra pietatz que·m guerisc’e·m defenda
		d'aquest segle terre
	50	que no·m trabuc ab se;
		car ieu·s ador e·us cre,
		senher, e·us fauc ufrenda
		de me e de ma fe,
		qu'aissi·s tanh e·s cove;
	55	per so vos crit merce
		e de mos tortz esmenda.
		La nuech vai e·l jorns ve
		ab clar cel e sere
		e l'alba no·s rete,
	60	ans ven belh' e complia.
V		Aquel glorios dieus que son cors det a venda
		per totz nos a salvar, prec qu'entre nos estenda
		lo sieu sant esperit, que de mal nos defenda,
		e d'aitan nos estre:
	65	josta los sieus nos me
		laisus on si capte
		e·ns meta dins sa tenda.
		La nuech vai e·l jorns ve
		ab clar cel e sere
	70	e l'alba no·s rete,
		ans ven belh' e complia.