Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Appareil critique
* Notes
* Traductions
* Images

Guarnerio, Pier Enea. Pietro Guglielmo di Luserna, trovatore italiano del sec. XIII. Genova: Tipografia di Angelo Ciminago, 1896

Code: 344,003 Auteur: Peire Guilhem de Luserna Genre: Sirventes Numero: II

En aquest gai sonet leuger

I 1 En aquest gai sonet leuger
    me voill en chantan esbaudir,
    car hom qe nos don' alegrer
    no sai que puosca esdevenir ;
  5 per q' eu me voill ab ioi tenir
    et ab los pros de Proenza,
    que regnan ab conoissenza
    et a bella captenenza,
    si q' om nols en pot escarnir.
     
II 10 De conquerre fin prez enter
    agra eu talen e desir,
    si no m'en faillissent dener
    e rendas, dont pogues complir
    los faiz, q'eu volgra mantenir ;
  15 mas pos a Deu non agenza
    q'eu posca far gran valenza,
    gardar me deu de faillenza
    almeinz e d'aizo q'ai a servir.
     
III   Qar prez no demanda ni quer
  20 ab cels que volon obedir,
    mas tant quant al poder s'afier,
    e qe hom se gart de faillir ;
    per qu'acel que trop vol tenir,
    a molt petit de scienza,
  25 car l'avers non a valenza
    mas q'om en trai sa guirenza,
    e qar hom s'en pot far grazir.
     
IV   A l'emperador dreiturer
    Frederic voill mandar e dir
  30 qe, se meillz no manten l'empier,
    Meilan lo cuida conquerir
    ab grans faiz e fai s'en auzir ;
    don vos jur, per ma credenza,
    que pauc prez sa conoissenza
  35 e son sen e sa sabenza,
    s'en breu no l'en sap far pentir.
     
V   Domna sai al cor plazenter,
    dunt negus hom non pot mal dir,
    e no tem gap de lausenger,
  40 e sap los meillors retenir
    ab honrar et ab acoillir ;
    tan gent fenis e comenza
    sos solaz e sa parvenza,
    qu'en re non i fai faillenza,
  45 et a car nom per encarzir.
     
VI   Na Joana d'Est agenza
    a toz los pros, ses faillenza,
    per q'eum voil ab los pros tenir.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI