Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Code: 377,004 Auteur: Pons de la Garda Genre: Canso Numero: VI

Mandat m'es que no·m receia

I		Mandat m'es que no·m recreia
		de cantar ni de solatz ;
		e quar plus soven no fatz
		chansos, m'o tenon a mal
	5	sill a cui chans e deportz abelis ;
		et a grat de sos amis
		deu hom far, com que l'en prenda.
II		Tota corteza fazenda,
		solatz, chant e joc e ris,
	10	mou ben d'Amor, so m'es vis.
		Qu'en tot pretz ajud' e val
		Amors trop mais d'autra re, so sapchatz ;
		et ades n'es hom coitatz
		de far so que ben esteia.
III	15	Don', en cui pretz senhoreia,
		ab bel cors plen de bontatz,
		complit de totas beutatz —
		ieu muer, mas a vos non cal.
		Pero nuils hom, d'aiso·m fauc ben devis,
	20	no·us er mais de cor tan fis :
		d'aiso no·us sai pas esmenda.
IV		Non es nuill jorn no·m essenda
		dezir de lei don languis ;
		tal talent ai que la vis
	25	c'un gran gaug complit, coral
		m'es quan la vei e mais re tan no·m platz ;
		car non pot esser iratz
		nuils hom lo jorn que la veia.
V		Lo dezirier e l'enveia
	30	que·m ve de leis par foudatz ;
		c'aisi·m soi enamoratz
		que non consir de ren al.
		Merce vos clam, bela don' ap clar vis,
		qu'ieu non ai, tan soi conquis,
	35	poder qu'estiers m'en defenda.
VI		Sel que ma chanso aprenda
		— sia loindas ho vezis —
		prec que la chant el païs
		al bel cors, de lin reial,
	40	gai e cortes de mon On-tot-mi-platz.
		qu'en lei es bos pretz prezatz
		e cascuns lo li autreia.