Frank, István. Pons de la Guardia, troubadour catalan du XIIe siècle. "Boletín de la Real Academia de Buenas Letras de Barcelona", 22 (1949), pp. 229-327.

Code: 377,005 Auteur: Pons de la Garda Genre: Canso Numero: VIII

Sitot no·m ai al cor gran alegransa

I		Sitot no·m ai al cor gran alegransa,
		si dey chantar e far bella semblansa ;
		e per so·m platz cobrir ma malanansa
		qu'ieu no vuelh dar gaug a mos enemis.
	5	E si·n diray alques de mos talans,
		en laissarai per paor moutz a dire.
II		Era no sai deves qual part me vire,
		pus mey amic ponhon en me aucire :
		que tals m'a fach so don planc e sospire
	10	qu'ie·us pliu ma fe qu'ieu cugey esser fis
		qu'el m'en serques mos pros e mos enans.
		Mas aissi falh hom e manhta fazenda.
III		No·n dirai tan que negus hom m’entenda,
		ni d'aquest tort no vuelh aver esmenda :
	15	si mal m'es pres, no vuelh que piegz mi prenda.
		Ai, cum fora gueritz s'ieu ja no vis
		lo jorn qu'ieu vi ni conuc los enjans
		que·m fetz aisselh don no vuelh mantenensa !
IV		Mas yeu sai ben qu'ilh a tal conoyssensa
	20	— may per si eys que per autra temensa —
		que·s laissara enves mi far falhensa
		e que·m sera leyals amicx e fis.
		Mas ja nulh temps, si vivia mil ans,
		no lo·y dirai s'ilh non o vol entendre.
V	25	Soen mi fai Amors ab se contendre :
		quan cug pojar, lo·m cove a deissendre.
		Mal aja·l jorns qu'Amors mi fetz emprendre !
		Quar s'ieu ames aisi com mos vezis,
		non sofrira las penas ni·ls afans
	30	que·m fai sufrir Amors la nueg e·l dia.
VI		En aisso fai Amors gran vilania :
		menhs fai de be a sselh qne mais s'i fia.
		Qu'ieu mi rancur d'Amor e de m'amia
		a cuy aurai loncx temps estat aclis ;
	35	e·l guizardos no'm es res mas affans,
		mas yeu·lh servi tostemps de bon coratge.
VII		Dieus mi laisses vezer ans qu'ieu moris
		cum fos mos pros, e ja no fos mos dans
		de vostr'amor, dompna de bon linhatge !