Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Code: 392,016 Auteur: Raimbaut de Vaqueiras Genre: Descort Numero: XVII

Descort

I	1	Engles, un novel descort
		fauc per remembransa
		de vos, en cui me conort
		de ma greu malenansa,
	5	qu’atressi·m nafr’ amors fort
		cum vos de sa lansa,
		estiers que gaug e deport
		n’avetz et ieu pezansa;
		et agra·m fait piegz de mort
	10	ma don’ e fiansa,
		mas bos comjatz m’a estort
		de sa mal’ acordansa,
		que parti m’en al seu tort
		en desacordansa,
	15	mas ela·m quis pois acort,
		on ai bon’ esperansa.
II		Per semblansa
		greu venjansa
		cujet de me prendre
	20	qu’e balansa
		mes s’amansa,
		on pogra mort atendre.
		Ses doptansa
		Andreus de Fransa
	25	no·s saup tan gen rendre,
		qu’ alegransa
		·m fo fermansa,
		al mielhs q’eu saup entendre,
III		Que ja non la perdes
	30	ni autra non ames
		e que segur estes
		de lieys, on que m’anes,
		qu’ elha tenri’ ades
		lo sieu cor del mieu pres.
IV	35	S’ie·y puesc atenher,
		be·m fes aut empenher
		mos Belhs Cavaliers,
		cant li·m plac senher
		lo bran per estenher
	40	jelos lauzengiers.
		Belh’ es ses penher,
		e no sen pot fenher
		adregz ricx parliers.
		Be·m pot destrenher,
	45	qu’elh’ es don’ e senher
		de mi ses totz pariers.
V		Mas cum que’m destrenha,
		jamais no·m planherai
		mal que d’elha·m venha,
	50	mas lo ben grazirai
		e l’onrad’ ensenha
		del sieu nom cridarai;
		e si prendre·m denha,
		a tapi li venrai
VI	55	Si cum Tristans, que·s fes guaita,
		tro qu’Yzeus fo vas si traita.
		Mort d’espaz’ ai’ eu forfaita,
		quan ja fos per me retraita
		tan grans honors, si·m fos faita,
	60	per qu’es folhs qui ja·m n’aguaita.