Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Code: 392,032 Auteur: Raimbaut de Vaqueiras Genre: Sirventes Numero: XVIII

Carros

I	1	Truan, mala guerra
		sai volon comensar
		domnas d’esta terra
		e vilas contrafar:
	5	en plan o en serra
		volon ciutat levar
		ab tors,
		quar tan pueia l’onors
		de leis que sotzterra
	10	lur pretz e·l sieu ten car,
		qu’es flors
		de totas las melhors,
		na Biatritz; car tan lur es sobreira
		qu’encontra lieis faran totas senheira
	15	e guerr’ e fuec e fum e polvereira.
II		La ciutatz s’ajosta
		e fan murs e fossatz;
		domnas, ses somosta,
		i venon de totz latz,
	20	si que pretz lur costa
		e jovens e beutatz.
		E pes
		que·l filha del marques
		n’aura manta josta,
	25	car a conques en patz
		totz bes
		e totz bos aibs cortes;
		e car es pros e franch’ e de bon aire
		non estara plus en patz que sos paire,
	30	que tornatz es a lansar et a traire.
III		Domnas de Versilha
		volon venir en l’ost,
		Sebeli e Guilha
		e na Riqueta tost,
	35	la mair’ e la filha
		d’Amsiza, can que cost;
		ades
		ven de Lenta n’Agnes
		e de Ventamilha
	40	na Guilhelm’ a rescost.
		Empres
		er la ciutatz en pes.
		De Canaves i ven molt gran companha,
		de Toscana, e domnas de Romanha,
	45	na Tomazin’ e·l damna de Soranha.
IV		Engles e Garsenda
		e Palmeir’ e n’Auditz,
		n’ Aud’ e na Berlenda,
		n’Agnes e n’Eloitz,
	50	volon que lur renda
		joven na Biatritz;
		si no,
		las domnas de Ponso
		en querran esmenda.
	55	E lai part Mon Senitz
		soma
		la ciutatz Contesso,
		qu’ades guerrei leis qu’es tan bon’ e bella,
		que sos gens cors tol a la Damizella
	60	e a totas color fresqu’ e novella.
V		Maria la Sarda
		e·l domna de sant Jortz,
		Berta e·l Bastarda
		mandon tot lur esfortz,
	65	que joves Lombarda
		non rest de sai los portz.
		E sai
		qu’a na Biatritz plai,
		quar lurs reiregarda
	70	non pot esser tan fortz
		qu’esglai
		lo sieu fin pretz verai.
		Donan lur senh, cavalcon ab gran joia;
		fag an ciutat et an li mes nom Troia:
	75	poestat fan de midons de Savoia.
VI		La ciutatz se vana
		de far ost en arrenc,
		e sona·l campana,
		e lo vielhs comuns venc,
	80	e ditz per ufana
		que chascuna desrenc;
		pueis ditz
		que·l bela Biatritz
		estai sobeirana
	85	de so que·l comuns tenc:
		aunitz
		n’es totz e desconfitz.
		Trompas sonon e la poestatz cria:
		“Demandem li beutat e cortezia,
	90	pretz e joven”, e totas cridon: “Sia!”
VII		La ciutatz se vueia
		e movon lur carros,
		e·l vielhs comuns pueia
		e gieton en lur dos
	95	coirassas de trueia
		ab que cobron lurs os;
		gambais
		an et arcs e carcais,
		e non temon plueia,
	100	ni mals temps no lur nos.
		Ueimais
		veirem de grans assais.
		De totas partz comenson a combatre;
		na Biatritz cuidan de pretz abatre,
	105	mas non lur val, seran per una quatre.
VIII		Per los murs a fendre
		fan engenhs e castels,
		e calabres tendre,
		gossas e manganels,
	110	fuec grezesc acendre,
		e fan volar cairels;
		de jos
		traucan murs ab bossos.
		Per tal no·s vol rendre
	115	lo sieus joves cors bels,
		joios,
		faz de bellas faissos.
		Totas cridan: “Ajuda, tras l’esponda!”
		l’un’ a l’altra; la tersa ten la fronda,
	120	e trazon tug li genh a la reonda.
IX		Na Biatritz monta
		e va·s de pretz garnir:
		ausberc ni porponta
		non vol, e vai ferir
	125	sel’ ab cui s’afronta,
		que pres es de morir;
		e jonh
		et abat pres e lonh.
		Fait a tanta jonta
	130	que l’ost fai desconfir;
		pueis ponh
		tant que·l carros desjonh.
		Tanta n’a prez’ e derrocad’ e morta
		que·l vielhs comuns s’ esmai’ e·s desconorta,
	135	si qu’a Troia l’enclaus dedinz la porta.
X		Na Biatritz, be·m plai quar es estorta
		a las vielhas, que·l vostres gens cors porta
		pretz e joven, c’a lor proeza morta.
XI		Bels Cavaliers, vostr’ amors mi conorta
	140	e·m dona joi e m’alegr’ e·m deporta,
		quant autra gens s’esmai’ e·s desconorta.