Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Code: 392,012 Auteur: Raimbaut de Vaqueiras Genre: Canso Numero: XXIII

Canso

I	1	D’una dona·m tueill e·m lais,
		qu’ieu no vueill sa paria
		pos vei que va de biais
		ni que ten autra via;
	5	qu’eu l’era fis e verais
		e ses tota bauzia,
		que per ma fe
		e’ l’amava mais que re;
		fassa son be,
	10	c’a far l’er, si·s pliu per me.
II		Ges non pres un botacais
		dona que aitals sia
		c’un prenda et autre·n lais:
		non fai ges cortezia.
	15	Soven presta son carcais,
		nuils hom non s’i fadia,
		segon qu’ieu cre;
		quar molt es de gran merce,
		qu’ieu ho sai be
	20	e d’autres moltz, per ma fe.
III		Ges una pruna d’avais
		en s’amor non daria,
		si be·m fai ni col ni cais;
		per que·us ho celaria?
	25	Quan la vei, m’o tenh a fais,
		s’alre far en podia.
		Sabes per que?
		. . . . . . . . . . . . . . . . . . . . . . . . .
		Dieus que·m mante
	30	l’en do so que l’en cove.
IV		Ben es tornad’ en debais
		la beutat qu’ill avia,
		e no l’en te pro borrais
		ni tefinhos que sia,
	35	et es ben razas hueimais,
		que·l jovens te sa via;
		e par li be
		a son escueill, qui la ve:
		mal si capte
	40	e fara peitz per jase.