Linskill, Joseph. The Poems of The Troubadour Raimbaut de Vaqueiras. The Hague: Mouton & Co

Code: 392,019 Auteur: Raimbaut de Vaqueiras Genre: Sirventes Numero: XXVIII

Sirventes

I	1	Ja hom pres ni dezeretatz
		non er de bos amicx garnitz,
		e·l manens qu’es d’aver issitz
		es vil tengutz e pauc amatz,
	5	e tostems hom desbaratatz
		ditz hom c’a perdut per nosen,
		e ten hom greu per fol manen
		ni home quan fort l’es ben pres;
		e fora savis e cortes
	10	qui des tan bon conseill denan
		com fai quant hom ha pres lo dan.
II		Ben pot hom en autruis foudatz
		apenre com er plus complitz,
		plus onratz e plus obezitz,
	15	e plus francx e plus ensenhatz;
		e non pot esser fort senatz
		qui no·s dona garda soven
		com l’uns pueja, l’autre deisen,
		e qui no conquer, quan luecx es,
	20	amicx; e quan los ha conques,
		gart los, quar mais hi a d’afan
		qu’el conquerer, al mieu semblan.
III		Vilas es et outracuidatz
		totz hom, quan si sent enrequitz,
	25	que’s cuida c’ab sos vilas digz,
		ab sobrieiras ni ab foudatz
		li deia hom esser privatz,
		ni c’om ja l’am de bon talen;
		e si tot hom lo·i fai parven
	30	per paor, aquo non es res,
		que quan lo trob’ om en deises,
		ab gaug et ab alegrer gran
		rizon tug, quant el vai ploran.
III		Eu dic que ben es estragatz
	35	hom rics erguillos descauzitz,
		que vol ades tener aunitz
		sos vezis ni apoderatz;
		e deu ben esser aziratz
		e mal volgutz per tota gen,
	40	et es razo si mal l’en pren,
		que nos avem vist et apres,
		per un ho per dos ho per tres,
		que si son anat percassan,
		don tug devem esser membran.
IV	45	C’aissi n’es lo setgle passatz
		que l’uns es pex, l’autr’ eisernitz,
		l’us vilas, l’autre gen noiritz,
		l’un mal apres, l’autr’ ensenhatz,
		e de totz mals estars cargatz,
	50	l’un vertader, e l’autre men;
		qu’el mon non a un tan valen
		en cui tug bon aip sion mes,
		for lo rei dels Aragones,
		quar en lui son tug ben sobran,
	55	ja non sabres demandar tan.