Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire

* Présentation
* Appareil critique
* Traductions
* Images

Anglade, Joseph. Les poésies de Peire Vidal. Paris: Librairie ancienne Honoré Champion, 1913

Code: 461,197 Auteur: Anònim Genre: Canso Numero: XLVIII

Pos vezem que l'iverns s'irais

I 1 Pos vezem que l'iverns s'irais
    E part se del tems amoros,
    Que non aug ges voutas ni lais
    Dels auzels per vergers folhos,
  5 Per lo freit del brun temporal
    Non laissarai un vers a far,
    E dirai alques mon talan.
     
II   Lonc desirier e greu pantais
    N'ai agut al cor cobeitos
  10 Ves cela qui suau me trais ;
    Mas anc ves li non fui greignos,
    Anz la portava el cor leial ;
    Molt fui leugiers a enganar,
    Mas peccat n'aia de l'aman.
     
III 15 No gens per autr' orgolh no·m lais
    De s'amor, don tan sui coitos,
    E conosc ben com ben mi pais
    E fui galiatz ad estros.
    Las ! remasutz sui del cabal,
  20 Qu'anc per autra non volc ponhar
    Per me ni per mon Drogoman.
     
IV   Totz meschavatz, car a gran fais
    Me teng, dona, quan pens de vos,
    Et quant n'aug parlar, m'es esglais,
  25 Et ja jorn no·n serai gaujos,
    Qu'eu sui iratz de vostre lau
    Et ai joi de vostre blasmar
    E plason me tuit vostre dan.
     
V   Non posc mudar que no·n biais
  30 Ves aquel joi tant orgolhos,
    Qu'anc non vi orgolh non abais ;
    Quan plus en poja, melhs cai jos ;
    Et es fols qui ve e qui au,
    E si non sab son melhs triar ;
  35 E n'a el siecle d'aquels tan !
     
VI   Hui mais s'en fenhan drutz e lais,
    Cel qui non estan enoios,
    Qu'a totz l'esfenis e lo lais
    Per so que no·n soi poderos.
  40 Pos poder no·i sai ben ni mal,
    Ben es dreitz qu'om lo desampar ;
    Et ai ne perdut mon afan.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI