Jeanroy, Alfred. Les chansons de Jaufré Rudel. Paris: Champion, 1915

Code: 262,006 Auteur: Jaufre Rudel de Blaja Genre: Vers Numero: I

Quan lo rossinhols el folhos

I	1	Quan lo rossinhols el folhos
		Dona d'amor e·n quier e·n pren
		E mou son chan jauzent joyos
		E remira sa par soven
	5	E·l riu son clar e·l prat son gen
		Pel novel deport que renha,
		Mi ven al cor grans joys jazer.
II		D'un' amistat suy enveyos,
		Quar no sai joya plus valen,
	10	C'or e dezir, que bona·m fos
		Si·m fazia d'amor prezen,
		Que·l cors a gras, delgat e gen
		E ses ren que·y descovenha,
		E s'amors bon' ab bon saber.
III	15	D'aquest' amor suy cossiros
		Vellan e pueys sompnhan dormen,
		Quar lai ay joy meravelhos,
		Per qu'ieu la jau jauzitz jauzen ;
		Mas sa beutatz no·m val nien,
	20	Quar nulhs amicx no m'essenha
		Cum ja n'aia bon saber.
IV		D'aquest' amor suy tan cochos
		Que quant ieu vau ves lieys corren
		Vejaire m'es qu'a reüsos
	25	M'en torn e qu'ela·s n'an fugen;
		E mos cavals i vai tan len
		Greu er qu'oimais i atenha
		S'Amors no la·m fa remaner.
V		Amors, alegres part de vos
	30	Per so quar vau mo mielhs queren,
		E suy en tant aventuros
		Qu'enqueras n'ay mon cor jauzen,
		La merce de mon bon guiren
		Que·m vol e m'apell' e·m denha
	35	E m'a tornat en bon esper.
VI		E qui sai rema deleytos
		E Dieu non siec en Belleen
		No sai cum ja mais sia pros
		Ni cum ja venh' a guerimen,
	40	Qu'ieu sai e crei, mon escien,
		Que selh qui Jhesus ensenha
		Segur' escola pot tener.