Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 436,004=282,021a Auteur: Simon Doria , Lanfranc Cigala Genre: Tenso Numero: III

Segn'en Lafranc, car es sobresabenz

I	1	Segn'en Lafranc, car es sobresabenz,
		vos clam merce qe mi fassatz secors;
		una domn'am, en cui regna valors,
		et ella mi, qar ben sui conoissenz:
	5	en cui metrai, segon vostra scienza,
		fina beutat, — e voluntatz nous venza —
		en leis, cui am, o starai m'en ioios,
		pos del donar m'a fait dieus poderos?
II		Amics Symon, qar ami finamenz,
	10	conseil de grat totz los entendedors;
		e d'autra part nous dei vedar acors,
		qar ieu vos am e vos sui be volenz;
		per q'ieus coseil qel beutat el plazenza
		a la domna donetz; no i a contenza,
	15	qar si trop mais non l'amasses qe vos,
		non creiria qe fosses amoros.
III		Segn'en Lafranc, lo vostr'esegnamenz
		mi plagra ben si nom forces paors;
		q'ieu ai dopte q'il nos vires aillors
	20	e nom cambges sos bels acuillimenz;
		qe pos beutatz s'es mesclad' ab valenza,
		ergoils en nais, qi dechai benvolenza,
		per q'ieu lam voil retener, q'aitals dos
		mi fora grieu qem fezes doloiros.
IV	25	Sius tolia per far plazers plazenz
		vostra domna sos gaugz e sos honors,
		en avol luec s'es messa vostr'amors,
		amics Symon, e vostr'entendemenz:
		per q'ieus conort qe non aiatz temenza,
	30	car pos il ha valor e conoissenza,
		silh ven per vos tan granz meillurazos,
		pensatz com er onratz lo gazardos.
V		Segn'en Lafranc, aqest razonamenz
		qem razonatz m'es pantais e dolors;
	35	ieu ai auzit, q'a bos conortadors
		non dol lo caps; per q'ieu n'estauc temenz;
		q'om non pot plus mas per bona creenza
		d'autrui saber son cor ni s'entendenza;
		mas de mi sai per cert qe per nuls bos
	40	meilluramenz non li for' oblidos.
VI		Amics Symon, ben par qeus etz fegnenz,
		qar non avetz lo cor dels amadors;
		qe sius coches amorosa sabors,
		nous issira del bec motz recrezenz.
	45	Ai, qom dissetz tan gran desconoissenza,
		qe pros domna fezes entrefaillenza?
		A qui mostratz qen es desamoros,
		mas nol sabra per me sos cors ioios.
VII		Segn'en Lafranc, franqez'e nuirimenz
	50	esmeron tan mi donz e sas lauzors,
		qe noil sufranh ni beutatz ni colors
		e non a par de rics faitz avinenz:
		per q'ieu puesc ben retenir ma parvenza
		---------
	55	s'ieu soi plazentz ni gais, qe a rescos
		li serai ieu sivals plus saboros.
VIII		Amics Simon, bem sembla dreigz nienz
		vostre parlars et ergoils et errors,
		q'anc de beutat non fon domna tan sors
	60	q'en leis regnes tota complidamenz,
		estiers mi donz q'ades meillur'e genza;
		e silvostra fos d'aital captenenza,
		hom far o vei a guiza de garzos;
		car eu non vei don mou la contenzos.
IX	65	Na Flors-de-lis, q'es razis e semenza
		de pretz entier, non voi qe sia tenza,
		segn'en Lafranc, d'aizo entre nos dos,
		anz mand'e voi q'aia fin la tenzos.
X		A dona tain beutatz e conoissenza
	70	e ad ome ardimenz e valenza,
		qar per beutat non es hom cabalos,
		q'amors non qer mas los valentz els pros.