Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Vocabulaire
* Rimaire

* Témoignage
* Appareil critique
* Notes
* Traductions
* Images

Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 282,001b=436,001a Auteur: Lanfranc Cigala , Simon Doria Genre: Tenso Numero: IV

Amics Symon, sius platz, vostra semblanza

I 1 Amics Symon, sius platz, vostra semblanza
    voil qem digatz d'aqetz dos partimenz:
    dos cavalliers sai qi d'un'egalanza
    fan messios honradas e plazenz;
  5 l'us es tan larcs q'al far n'a alegranza
    nil coston re, q'aitals es sos talenz;
    l'autr'a son cor escars que n'a pezanza,
    mas per talan q'a d'onor son cor venz.
    A cui deu hom mais grazir tal honranza?
     
II 10 Segn'en Lafranc, ieu ai drecha balanza
    e sai triar entre los conoissenz,
    per q'ieu vos diceus sui bona fermanza
    q'om non fora per cobeitat valenz,
    qe se dones e mezes tota Franza
  15 iradamen, non for'entre las genz
    grazitz, mas sei deu hom dir qe sobranza
    qi de bon cor fai [onratz] faitz plazenz
    e cel n'a grat e mi platz s'amistanza.
     
III   Amics Symon, non es gran maestria,
  20 sel larcs sap far honradas messios,
    qe sos talantz e sos cors li en fan via;
    non es doncs sols, anz i ha compagnos.
    Mai d'esforz fai cel qe sos cors desvia
    e sos talantz li n'es contrarios
  25 et el los venz ambdos e n'a bailia:
    doncs qar el es d'onor plus deziros,
    mal estera s'om plus non l'o grazia.
     
IV   Segn'en Lafranc, qi q'o voilha so dia,
    qe mil aitantz es plus grazitz lo dos
  30 e l'onramenz qi nais de cortezia
    q'aicel de cor destreg e consiros,
    qe s'om destregz n'escars fai galaubia,
    esfortz fai gran, mas non es gracios,
    qar non li ven de francha galliardia:
  35 e pos nolfai alegre ni ioios,
    el pert lo don el grat e qan qe sia.
     
V   L'onrars del lare, Symon, qais d'aventura
    ven ses percatz, per q'om noldeu prezar
    tant qom l'autre qi nais d'avinen cura,
  40 mal grat del cor, don fai plus a lauzar
    e si el cor s'en dol, non es rancura
    ni laitz semblantz, tant gen sab ioi menar;
    per q'om l'o deu grazir mas de mezura,
    qar qi mais fa d'esfortz per ben istar
  45 mais deu aver de grat, segon drechura.
     
VI   Segn'en Lafranc, chascus hom per natura
    es pars d'autrui, mas aqel qi sap far
    mais de plazers de bon cor plus meillura
    e aqel deu sobrels autres puiar;
  50 donc es garnitz de meillor vestidura
    aicel q'al cor et talant en donar
    et en servir, per q'ieu vei qe peiura
    vostra razos, sim voletz contrastar,
    si ben sabetz mai qe me d'escrichura.
     
VII 55 Amics Symon, ieu ai ferma creenza,
    s'om es temptatz de grieu temptacion
    et el a tant de valor qe la venza,
    qen deu aver plus honrat guizardon
    qe sel qi serf ses trebail e ses tenza;
  60 doncs cel qi ventz son avol cor fellon
    e fal mal grat del cor faig de plazenza,
    qar don'e met e ventz tal campion,
    mer mais de grat, segon ma conoiscenza.
     
VIII   Segn'en Lafranc, ben gran desconoissenza
  65 fora e mi, se d'aqesta tenzon
    vos clames qit, pos vos aug dir faillenza,
    per q'ieu voil plus afortir ma razon;
    qe se l'om serf de cor, a ma parvenza
    cel qi lo fai contra son corazon
  70 non es sos pars, si tot vol far valenza;
    qe sivals tant deu hom mais prezar don,
    qant es plus datz franchamen ses coutenza.
     
IX   A'n Jacme Gril, en cui es conoissenza,
    amics Symon, trametam la tenzon,
  75 q'en cobleian en don drecha sentenza.
     
X   Segn'en Lafranc, ben ai ferma crezenza
    qe sera ben iutiada per razon
    per lui, qar sap zo q'a fin pretz agenza.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI