Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 436,001282,001= Auteur: Simon Doria , Lanfranc Cigala Genre: Tenso Numero: V

Car es tant conoissenz vos voil

I	1	Car es tant conoissenz vos voil,
		segn'en Lafranc, qerer d'amor,
		q'ien voil apenr'e ai paor
		non trassailis als prims essais:
	5	qal prezatz mais?
		o valen domna conqerer
		per gran saber
		o qe proeza vos enanz
		tan qe de leis siatz ioios?
II	10	Simon, non sui ges com ieu soil,
		qar ieu cuiei ia per error
		qe sabers guides l'amador,
		mais ar d'aqel cuiar mi lais,
		qar amor pais
	15	iois on granz senz non pot caber;
		c'ab franc voler
		d'ardit cor vai amors enanz,
		e granz senz l'es contrarios.
III		De vostre conseil mi destoil,
	20	segn'en Lafranc, ia mais no i cor;
		qar vos laissatz senz per follor
		e de folli' ardimenz nais
		ab granz eslais;
		donc pos follatges n'al poder,
	25	grieu pot valer
		nuls hom ni far bels faigz prezanz,
		si nol guida senz o razos.
IV		Folia nom platz ni l'acoil
		ia nom dones aital color;
	30	mas granz senz no m'a tal sabor
		en amar, car mais i val iais,
		ni non retrais
		qem vengues foudatz a plazer;
		anz dic per ver
	35	tot zo non es ges foudatz granz
		qi non es senz als amoros.
V		Segn'en Lafranc, d'amor mi doil
		e n'ai pensamen e dolor
		e non puesc venzer per ricor
	40	ni per ardimen tan gran fais;
		anz creis l'esmais
		qim fa qada dia doler
		em desesper;
		per qe sel sens no m'es garantz
	45	qim guide, morrai ad estros.
VI		Amors vol qe cors d'amic broil
		de ioi, de pretz e de valor
		e de bel solatz chascun ior,
		e granz senz l'es dols e pantais
	50	e s'en irais;
		donc sius deu senz d'amor valer,
		al mieu parer
		partretz vos en per sos comanz,
		per q'es granz senz meinz saboros.
VII	55	Na Flors-de-lis pretz e saber
		ten en poder,
		iutge sil platz deserenanz
		e Jacme Grils q'es gais e pros.
		Symon, ab mi si deu tener,
	60	al mieu parer,
		na Flors, e s'il n'es acordanz,
		nom chal s'en Jacmes ten ab vos.