Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 201,004b=282,012a Auteur: Guillem , Lanfranc Cigala Genre: Tenso Numero: IX

Lafranc, digatz vostre semblan

I	1	Lafranc, digatz vostre semblan,
		qeus par d'estas doas razos;
		e nous enueje ma tenzos
		si beus vauc ades menassan;
	5	qe saber volrai vostre sen,
		qal penriatz tota via:
		qe acses la drudaria
		d'una gentil donn'e plazen
		e no fos per negun saubut,
	10	o qeus tenguesson tuig per drut
		cil q'en parlesson a prezen
		e no n'acses plus iauzimen?
II		Guillem, bem tenetz per enfan,
		qan los plazens faitz amoros
	15	mi partes egal ab rezos
		de mensongier e de truan;
		mas ieu penrai sabiamen,
		q'ieu non lais sen per follia,
		per q'ieu soan la bauzia
	20	ab los fals rezos de la gen,
		et a guiza d'aperceubut
		pren lo ioi, q'avetz mentagut
		enanz; una vetz senglamen
		ben mais doncs en volgra de cen.
III	25	Meravilla m'en don trop gran,
		Lafranc, qi pren cosseil de vos,
		q'a vostr'obs n'es tan sofraitos,
		qe no i conoissetz pro ni dan;
		qe per complir vostre talen
	30	una noig o un sol dia
		laissatz lo ioi quieus tenria
		tostemps mais al vostre viven:
		cuiatz tuit cil, q'an entendut,
		aion cel ben d'amor aüt?
	35	Non an; mas lo lau de la gen
		prenon en luec de ioi plazen.
IV		Guillem, eu ai apres aman
		de voler ioi d'amor rescos,
		e vos mi semblatz d'amor blos,
	40	qils fals bruitz anatz razonan;
		q'a mi ia noca fora gen,
		si fos vers, s'om en brujia;
		e doncs quossim plazeria
		mensongi'e fals bruis de nien?
	45	q'ieu sai, s'ieu agues brui volgut,
		maintas vetz auria perdut
		ioi d'amor, q'anava qeren,
		qim tenc pois a celat iauzen.
V		Lafranc, ben avetz vil talan
	50	e ben pauc vos vei enveios
		de ioi ni d'onor cobeitos,
		q'enaissi metetz en soan
		lauzor e saubut honramen,
		per ioi don res non sabria;
	55	qel thesaurs ia non valria,
		qil celes qe noi fes parven,
		plus com fai peira ses vertut:
		estrain plai avetz mentagut,
		q'escars e destreig e tenen
	60	tenran tuit per ben vostre sen.
VI		Guillem, thesaurs, qi non l'espan
		e no'n fai larga messios,
		non val plus con aitan carbos;
		aizo nous vauc eu tenzonan,
	65	mas iois d'amor vai d'autramen;
		qar s'ieu brui d'amor volia,
		ia mais pois non amaria
		l'onor de mi donz leialmen;
		q'om deu cuillir l'amoros frut
	70	a celat, ses autrui aiut,
		qez amors dechai mantenen,
		sil sabon mas dui solamen.
VII		Lafranc, de vos ai cognogut
		q'assatz ben avetz combatut
	75	e tenzonat lo partimen;
		pero no i avetz agut sen.
VIII		Guillem, pois ieu vos hai vencut,
		ses saber, q'ieu non hai agut,
		s'ieu agues pron d'ensegnamen,
	80	gardatz cous vencera corren.