Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 282,001a=429,001 Auteur: Lanfranc Cigala , Rubaut Genre: Tenso Numero: X

Amics Rubaut, de leis, q'am ses bauzia

I	1	Amics Rubaut, de leis, q'am ses bauzia,
		vos dirai cossim vai;
		qe qant mi ve, elam ri tota via,
		mas autre be nom fai;
	5	non sai si men'esquern o iai.
		Vos qen cuidatz? Fai o per tricharia,
		o qar li plai m'amors e ma paria?
II		Segn'en Lafranc, pos voletz q'eu vos dia
		mon semblan, vol dirai:
	10	cella q'amatz crei q'a cor qeus aucia
		pos nulh ioi nos atrai,
		q'ab ris vos trahis eus dechai,
		com fetz baizan Juda Dieu, ses faillia,
		e sim despiai q'ill es vostr'enemia.
III	15	Amics Rubaut, se mi donz aitals era
		com cella qius trahi,
		zo qe dizes ges non desconfessera
		qe non fos enaissi;
		mas ab leial cor e pretz fi
	20	regna mi donz, per q'ieu non autregera,
		pos elam ri, qem fos falsa ni fera.
IV		Segn'en Lafranc, savis hom non lauzera
		zo qe lauzatz aici,
		qar ia domna q'ames tant non celera
	25	son cor a son ami;
		mas per o qar vos faitz fals ri,
		non crei qeus am, ni ieu non lo prezera,
		qil fez a mi, anz m'en desesperera.
V		Rubaut, ris nais de ioi e d'alegranza
	30	e d'amoros talen,
		et es del cor veraia demostranza
		q'el veia ren plazen;
		doncs sim garda mi donz rizen,
		nom pot d'amor far plus bella semblanza,
	35	et eu o pren enaissi, ses doptanza.
VI		Segn'en Lafranc, nous puesc gitar d'erranza,
		tant amatz follamen,
		car vos prenetz ris en luec d'amistanza;
		mas ieu nom n'atalen,
	40	qe badars mi don'espaven.
		Vos atendretz vostra bon'esperanza,
		mas ieu enten qeus er desesperanza.
VII		Rubaut, apres lo ris aten
		q'eu aurai ioi de leis e benenanza,
	45	qar non desmen ma domna sa semblanza.
VII		Lafranc, si del ris ben vos ven,
		ben poiretz dir q'aventuraus enanza:
		pero rizen gab'om los fols en Franza.