Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 101,011a=433,001 Auteur: Bonifaci Calvo , Scot Genre: Tenso Numero: XI

Scotz, qals mais vos plazeria

I	1	Scotz, qals mais vos plazeria
		d'aqetz dos plazentz solatz:
		far podetz de vostr'amia
		totas vostras voluntatz,
	5	mas per re nous consentria
		qeil parletz ni la veiatz
		e'n aitan qan viva sia
		ia tant non seretz amatz:
		o vezer la tota via
	10	e parlar ab leis poscatz,
		mas del plus non vos valria,
		ni forzar non la deiatz;
		ar veirem qal penriatz
		e no i gardetz cortezia.
II	15	Bonifaci, fols seria
		s'ieu mi donz, on es beutatz,
		pogues aver a ma guia
		e tener nud'en mos bratz,
		s'ieu tot parlar nolh podia
	20	el vezers m'en fos vedatz,
		s'ieu aissi non la penria;
		qel parlars qe m'autreiatz
		el vezers mi doblaria
		l'afan, sel plus non fos datz.
	25	E qan mi remembraria
		q'aissim fos desesperatz,
		lo vas fos apareillatz,
		qe ia plus ieu non viuria.
III		Scotz, segon ma conoiscenza,
	30	follamen sabetz chauzir,
		qan de leis l'umil parvenza
		el bel semblan el gen dir
		giqetz, qar mais vos agenza
		ab leis iazer e durmir;
	35	q'el mond plus greu penedenza
		non crei q'om pogues suffrir,
		com de parlar estenenza,
		pos q'om n'a cor e dezir;
		ni res nom pot far vallenza
	40	ni conort ni abeillir
		ses vezer; al meu albir
		vos faill gan re de sabenza.
IV		Bonifaci, en sovinenza
		hai mi donz e la remir
	45	tal col iom q'amors semenza
		en me de leis fes flurir
		el cor qi de l'estenenza
		del vezer mi fai garir,
		e del parlar m'es guirenza
	50	baizar, tener e complir:
		mas vostres mals encomenza
		totz iorns e non pot fenir;
		per qe vos er, ses bistenza,
		zom par e nous pot fallir,
	55	com Tantalus a murir,
		e d'aizo aiatz plivenza.
V		Scotz, pos ma donna m'autreia
		q'ieu parl'ab leis e domneg,
		e q'ieu la remir e vela,
	60	semblam qe truep ben espleg;
		e qar non tain q'esser deia
		pros domna d'avol autreg,
		nom pren del iazer enveia,
		q'ieu am mais, q'eu non enveg;
	65	mas vostre fols cors dereia
		e vol ab gienh passar dreg,
		per q'ieu non conseil qeus creia
		domna, qui a pretz eleg;
		qar nous vei prim ni adreg
	70	ves qe fin'amor plaideia.
VI		Bonifatz, bem par q'esteia
		en pena e cor destreg
		cel qui leis qe plus enveia
		e plus am'en tot endreg
	75	ve eil parl'e zo deneia
		per q'amors fort lo destreg;
		e a vos platz, qar nous greia
		amors nius fai chaut ni freg:
		mas ieu cui amors guerreia
	80	voil lo iazer, car ieu veg
		q'alcus hom per al non preia;
		per q'enantz voler lo deg,
		e del domnei me refreg,
		qar qecs ab si donz domneia.