Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 290,001 Auteur: Luquet Gatelus Genre: Sirventes Numero: XIII

Cora q'eu fos marritz ni consiros

I	1	Cora q'eu fos marritz ni consiros
		per dan de pretz qe chascus relinqia,
		aram conort e sui gais e ioios,
		car iois e pretz revendra qis perdia,
	5	car lo pros coms proenzals Lumbardia
		vol conqerer e Toscan'e Poilles,
		e d'autra part Conrat vol son paes
		el rei Matfre non s'i acorda mia:
		per q'entrels faitz aura pretz sa bailia.
II	10	Sel pros Coms val segon q'es poderos,
		un mirail ha, on mirar se deuria,
		e se's mires els faitz del rei n'Anfos,
		ben sai per ver qe tant non tardaria
		zo q'a empres, qe laissar non poiria,
	15	s'el non laisses tot lo pres q'a conqes;
		qel bruitz es tant vas totas partz estes,
		q'o sabon ia de la mar en Suria
		e d'Espagna entro en Normandia.
III		Donc albir se, pois tals es lo rezos,
	20	si s'en rema, tot zo q'om en diria,
		e membre li qe Carl ab sos baros
		conqes Poilla e n'ac la segnoria
		e dels granz faitz qe Franza far solia.
		Ara n'estan avol cor en defes;
	25	e pois lo nom de Carle en lui es,
		segals seus faitz, q'estiers a tort seria
		per sel clamatz qe valc, s'el non valia.
IV		E se Conratz non es valenz e pros
		deslignara, car li seu an Soria;
	30	non eral seu bastant, se plus noi fos:
		donc se laissa so q'esser seu deuria,
		fara semblant qe mal l'altrui tenria,
		e si no ven recobrar demanes,
		fara creire so qel rei diz espres:
	35	q'el sia mortz, e q'autr' el sieu luec sia,
		qe s'el fos vius, lo sieu demandaria.
V		Sel rei Matfres [no] fos [ia] coratios,
		e zo qe te conqes per galiardia
		s'era lo pert, qant es rei, per un dos
	40	n'aura blasme, quar mais de carestia
		lo deu gardar com plus l'ac a fadia;
		et als baros, on ha tant del seu mes,
		membre cal son, ni eran, ni con es;
		e penz chascuns de gardar noig e dia
	45	zo q'ab autre segnor mais non auria.
VI		Bernart, apren e chantal sirventes,
		e poiras dir, sel cor non fail als tres,
		qel iuecs sera entaulatz ses faillia:
		mas tant o voil q'eu non crei qe ia sia.