Bertoni, Giulio. I trovatori minori di Genova. Dresden: Gesellschaft für Romanische Literatur, 1903

Code: 290,001a Auteur: Luquet Gatelus Genre: Sirventes Numero: XIV

D'un sirventes m'es granz volontatz preza

I	1	D'un sirventes m'es granz volontatz preza
		q'ieu trameta al pro rei dels Poiles,
		e si tot s'es en sobreira richeza,
		s'eu lo conseil, noil desplaza nil pes;
	5	qe de fol apren hom tot dia
		sen; e qi ben enten, ben tria:
		per q'ieu li prec q'entenda mo saber,
		pois l'aprenda ol met'a non chaler.
II		Can reis desten son cor en gran empreza,
	10	contendre'n pauc non l'es honors ni bes;
		qel pauc contrast adutz provetz defeza
		mais qe l'assais e pois valpauc conqes;
		e silreis volla vicaria
		del emperi ni la baillia,
	15	non l'entenda senz effortz conqerer,
		si tot a cor q'a tant agral poder.
III		Non dicieu ges pos aura Posta preza,
		com qe sia, qe la demeta ges;
		qel demetres li seria flacheza,
	20	don l'enemic creisseran per un tres
		el cors dels amics mermaria;
		mais ieu dic q'al primer deuria
		totz reis triar so q'empren e vezer
		q'aizo q'empren l'aven pois mantener.
IV	25	Done derenan mostr'al mon sa auteza
		d'autra guiza, s'aver la volmanes,
		e non ublit perdon per null'ofeza,
		pos merceian en son poder li er qes;
		e qui qe volla senhoria
	30	portar en obr'e en paria,
		prenda la .... e non cobeit l'aver
		lo sobreplus, q'en breu faillon lezer.
V		E gart se ben en cui se fi ni creza,
		car en aizo granz partz dels seus faitz es,
	35	e non se fi en chascuna promeza,
		ni tot son vol non digu'en totas res:
		mas en son cor port tota via
		la balanza e qe qe sia
		pez e balanz los digz els faitz en ver,
	40	el miels prendre non perda per voler.
VI		Tant al rei cor qe noil plairia
		hom senz cor en sa compagnia,
		segn'en Sordel, per q'eu non l'aus vezer,
		qe mon cor a tals don nolpois mover.