Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 282,018 Auteur: Lanfranc Cigala Genre: Chanson religieuse Numero: XL

Pensius de cor e marritz

I	1	Pensius de cor e marritz
		cobleiarai, car mi platz;
	3	e non voill esser blasmatz
		si mos chanz non es grazitz
		tant qom s’ieu era alegranz;
	6	c’anc iocs ni solatz ni chanz
		ses alegrer non agron lur saizon:
		mas chantar voill, vailla mos chanz o non.
II	9	Pero s’ieu tot sui marritz,
		qan eu sui pro apensatz
		meravillas vei assatz;
	12	mas d’una·m sui esbaitz,
		don sui trop meravillanz,
		car passa totas las granz:
	15	coissi pot far mesfaig ni faillizon
		hom qui de mort non cuid’aver perdon.
III		Mas chascus, don sui marritz,
	18	[e]stai de mort seguratz,
		e sap que non er mudatz,
		que chascuns er sepellitz;
	21	mas qui non laissa·ls enianz
		sembla que·n sia doptanz:
		car qui tailla de sa mort lo baston
	24	non crei morir, o sabers no·ill ten pron.
IV		Mas de mi sui plus marritz,
		meravillos et iraz;
	27	car zo, qu’eu plus repren, fatz
		vas Dieu, qui mortz e traitz
		fon per nos gardar dels danz
	30	e dels enfernals affanz;
		mas s’ai faillit eu li prec que·m perdon,
		e farai li chantan confession.
V	33	Qu’eu ai faig, don sui marritz,
		los set criminals peccatz
		—de que m’enoi’e·m desplatz—
	36	e dels faillimenz petitz
		tanz qu’eu no·n sui remembranz.
		Per qu’eu·s acli sopleianz,
	39	Dieus qu’en crotz perdonest a un lairon,
		que·m perdonetz e no·i gardetz razon.
VI		Pero non sui tan marritz
	42	qu’eu sia desesperaz;
		quar ai vist dels plus nafratz
		per vostra merce gueritz;
	45	per qu’eu·s requier merceianz,
		quar dreitz vol mos dezenanz:
		e doncs merces m’aiut, qu’eu la somon,
	48	e dreitz soan, qu’a mon obs no·l teing bon.
VII		Maire de Dieu, totz mos anz
		mi faitz far vostres comanz,
	51	qu’aissi serai certz de salvacion,
		per qu’eu·s en prec com cel que vostr’om son.