Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 244,011 Auteur: Guiraut d'Espanha Genre: Canso Numero: LXXIV

Qui en pascor non chanta nom par gays

I	1	Qui en pascor non chanta nom par gays,
		pus l'auzelet comenson lur dous chan
		per la frescor del temps e pel verian
		d'amor que bat; mas ieu suy batutz mais;
	5	est'ochaizons ioi e chantar m'adutz,
		tan suy tostems ben-volens non-volgutz
		de la belha de cuy mi fai atendre
		amors selh ioy que d'autra no denh pendre.
II		Mas be·m platz chans, quar fis amicx verays
	10	suy de midons de cor e de semblan,
		et en lieys son tug miei maior talan,
		qu'az autra part mon voler non biays;
		ans mos fis cors l'es aissi totz rendutz
		qu'a me non es ni vida ni salutz
	15	mas tan quan pes de liey, que·m fai despendre
		mos iorns languen, e no me·n puesc defendre.
III		No·m puesc ni·m vuelh defendre nulh tems mais,
		ans atendray a lley de fin aman;
		mas ben sapcha qu'ieu non puesc viure tan
	20	ses iauziment com viu selh cuy ioys pays;
		e pus tostemps mi suy per sieus tengutz
		despus la vi, totz de s'amor vencutz,
		per merce·l prec que no·m fassa dessendre
		del bon esper, qu'en als non aus entendre.
IV	25	Tant tem son pretz, qu'es tan fis c'anc non frays,
		que, quan s'ave que·l puesc esser denan,
		yeu muer aman e no·m n'aus trair' avan,
		que·l retraya so qu'enquer no·lh retrays.
		las! Que·n faray? Tostemps n'estarai mutz,
	30	si·l sieus gens cors plazens ben entendutz
		non enten so de qu'ieu non aus entendre;
		mas ylh val tant qu'hom no me·n deu menspendre.
V		Ben ay'amors, qu'en lieys servir m'atrays
		al prim qu'ieu vi son belh cors benestan,
	35	nou de novel, iove, tan gen gardan
		qu'ab sos nous huelhs mon cor del cors mi trays,
		per qu'es totz sieus, qu'anc no·l fon defendutz
		lo cors; ni·l plac que·n fos pueys rezemutz;
		ni rezemsos no lo·m poiria rendre;
	40	so·m fes amors lo iorn que·m pres, aprendre.
VI		Na Berengueira, vostre fis pretz lutz
		sobre·ls pus clars, e volgra fos vengutz
		lo coms Karles lai on lo fes ensendre
		vostra beutatz; mas no·n pogues plus prendre.
VII	45	Senher dieus, n'autreiatz per apendre
		totz hom qui'n pretz ni'n valor vol entendre.