Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 142,001 Auteur: Esperdut Genre: Canso Numero: XLII

Lo dezirier e·l talan e l'enveya

I	1	Lo dezirier e·l talan e l'enveya
		que·m ven de vos, grazisc, ma douss' amia,
		e·l cossirier e·l maltrag e·l languir
		qu'ieu ai suffert, pus vos vi, nueg e dia;
	5	e pus lo cors lo maltrag vos merceya,
		si·l dessetz ioy, gen lo·us saupra grazir;
		mas yeu no cug qu'hom am per bona fe,
		si de amor non grazis mal o be.
II		Ben suy arditz, quar de vos ay enveya,
	10	mas non puesc may, que la grans cortezia
		e la beutatz fai mon cor enardir,
		que avetz may que nulh'autra que sia;
		e pus amors mi sobresenhoreya
		e·m fay amar vos, cuy non o aus dir,
	15	non puesc alhor per re virar mo fre,
		per que·l meu mal degratz tornar en be.
III		Dels cortes drutz que an d'amar enveya,
		ay en mon cor temensa e gelozia;
		mas yeu non cre qu'autru·s denh a'belhir,
	20	tant es valens e de belha paria;
		e quar quecx ditz que la melhor sopleya,
		dobla·m paors; mas una re·m cossir:
		que, pus yeu vey que tan gen se capte,
		al sieu ligge no fassa mays de be.
IV	25	Bona dompna, quals que vos port enveya,
		yeu vos am mays, si dieus me benezia,
		que·l cor e·l sen ay mes en vos servir
		er e iasse, tro que la mortz m'aucia;
		e ges de vos loncs atens no·m esfreya,
	30	s'al mieu viven me·n sabia iauzir;
		e si·us sove, bona dompna, de me,
		lo mieus ioys er pujatz sobre tot be.
V		Mays am murir, dompna, per vostra enveya
		que d'autr'amor aver la senhoria,
	35	quar yeu am mays per vos pena suffrir
		que deshonratz aver gran manentia;
		de vos, dompna, en cuy bos pretz s'autreya,
		seray pro ricx, si·m denhatz aculhir
		qu'ieu clam merce en mas chansos iasse;
	40	e si no·us play, no·m fassatz autre be.