Audiau, Jean. Les poésies des quatre troubadours d'Ussel, publiées d'après les manuscrits. Paris: Librarie Delagrave, 1922.

Code: 194,003 Auteur: Gui d'Ussel Genre: Canso Numero: I

Ben feira chanzos plus soven

I	1	Ben feira chanzos plus soven,
		Mas enoja·m tot jorn a dire
		Q’eu plang per amor e sospire,
		Qar o sabon tuit dir comunalmen ;
	5	Per q’eu volgra motz nous ab son plasen,
		Mas re no trob q'autra vez dit no sia.
		De cal gisa·us pregarai doncs, amia ?
		Aqo meteis dirai d'autre semblan,
		Q’aisi farai senblar novel mon chan.
II	10	Amada vos ai lonjamen,
		Et enqer non ai cor qe·m vire ;
		Donc, si per so·m volez aucire,
		No n’aurez ges de bon razonamen ;
		Anz sapchaz ben c’a major failimen
	15	Vos er tengut q’ad autra no seria,
		C’usatges es, et a durat mant dia,
		Q’om blasma plus, qan fail, cel qe val tan,
		Qe dels malvatz no s’o ten hom a dan.
III		Dompna, ben sai certanamen
	20	Q’el mon non posc mais dompn’eslire
		Don qalsqe bes no si’a dire,
		O q’om pensan no formes plus valen ;
		Mas vos passatz sobre tot pensamen
		Et atresi dic vos q’om non poiria
	25	Pensar amor qi fos pars a la mia.
		Sitot non posc aver valor tan gran,
		Endreit d’amor, sivals no·i engan !
IV		Esters, sol q’a vos estes gen,
		No·i trob razo, qan m’o consire,
	30	Qe, si·m faz mal, qe ja·m n’azire ;
		Tant gent lo·m faitz, ses fat adiramen,
		Ab bel senblan et ab acoillimen
		Que·m remembra mos fols cors tuta via,
		On plus mos sens m’en blasm’e m’en chastia ;
	35	Mas non sai cum s’eschai de fin aman
		Qe·l sens no·i a poder contra·l talan.
V		Dompn’ab un baisar solamen
		Agr’eu tot cant voil e desire,
		E prometetz lo·m e no·us tire,
	40	Sivals per mal de l’enojosa gen,
		Q’aurian dol, si·m vezian jauzen,
		E per amor dels adreitz, cui plairia ;
		Qar engalmen s’atang a cortesia
		Q’om fass’ enoi als enojos qe·l fan
	45	Et als adrecs fassa tot qant voldran.
VI		Ves Albuzo, chanzos, ten tost ta via
		A la meillor fors una q’el mon sia ;
		Q’en leis pot hom apenre cosi·s fan
		Jois e solatz ab gai cors benestan.