Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 342,001 Auteur: Peire Espaignol Genre: Alba religieuse Numero: XLV

Ar levatz sus, francha corteza gens!

I	1	Ar levatz sus, francha corteza gens!
		levatz, levatz, trop avetz demorat;
	3	qu’apropchatz s’es lo iors clars e luzens
		que lo nos a la doss’ alba menat.
		Rescepcha·l doncx chascus letz e iauzens,
	6	e meta fors de si tot’escurtat.
		Pero vejatz quals es lo iors ni l’alba:
II		Lo iors es Dieus, li autz omnipotens
	9	que venc en charn, don a·l mon alhumnat;
		e l’alba es, don sest iors fu naissens,
		la rëyna maire de pïatat.
	12	Ben deu estre grazitz son ricx prezens,
		e ia sia, qu’ilh nos a prezentat;
		pres es del iorn qui a ab si est’alba.
III	15	A, cum er selh astrucx, ricx e manens
		qu’a tal dompna poira servir de grat!
		Quar trop val pus estre de lieys sirvens
	18	que conquerir emperi ni regnat;
		qu’elh’ es als sieus say garda e guirens,
		e les manten si que no son dampat,
	21	ni no·ls pren nuetz can lur es pres est’alba.
IV		Chascus sia de si eys sovinens
		que non demor en l’escur del peccat;
	24	espleyta·ls iors oran cels chars prezens
		ans que la mortz li tuelha la clartat,
		quar ynfers es si escurs e pudens
	27	que ia layns li chaitif mal fadat
		non auran mais lum ni clardat ni alba.
V		Mas ia negus que sia penedens
	30	no·s desesper; si tot s’a mal obrat,
		s’en lays e s’esfors del emendamens
		e sia clars si a escurs estat;
	33	quar dels dos fis fols [fo lo pus] mechens
		mielhs aculhitz quant ac son sen camjat.
		Doncx qui m’enten, pus que·l serv, pregue l’alba.
VI	36	Sesta dama onron totz humillat,
		quar elha es de totz bes fons et alba.