Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 370,015 Auteur: Perdigon Genre: Chanson religieuse Numero: XLVII

Verges, en bon'hora

I	1	Verges, en bon’hora
		portes lo salvaire,
	3	que selh vos honora
		e us fai ioya faire;
		el pobol[s] que fora
	6	liuratz a maltraire
		vos pregu’e s’ahora,
		santa plazen maire;
	9	quar d’ir’e d’esmay
		e de tot esglay
		guardatz lo pus laire
	12	que vas vos s’atray.
II		Domna doussa e bona,
		humil, de bon aire,
	15	aiuda e perdona
		ad aquest peccaire;
		guarda ma persona
	18	d’anta e de mal faire,
		e m’arma razona
		ab lo tieu car paire,
	21	que·ls peccatz qu’ieu ai
		fatz ni ditz ni sai
		no·m puescan mal faire
	24	quan del segl’iray.
III		De gracïa plena
		avetz nom, Maria;
	27	quar getatz de pena
		cuy merce vos cria;
		lïam ni cadena
	30	no·l te ni·l tenria,
		pus qu’ab quarantena
		gen vos humilia;
	33	penedensa fai
		hom iust’e veray’
		e per aital via
	36	va senes esmay.
IV		Regina d’auteza
		e de senhoria:
	39	la vostra franqueza
		a·l mon en bailia;
		de tota boneza
	42	etz roz’espandia,
		quar en vos s’es meza
		gracïa floria,
	45	aisselh frug verai
		qu’intret ab lo rai
		en vos, dona pia,
	48	quan l’angel venc sai.
V		Verges, en efansa
		nasquet lo dous sire
	51	de vos, ses duptansa,
		de qu’ieu suy servire;
		la sua pitansa
	54	mi fassa iauzire
		ab gran alegransa
		dels bes qu’ieu dezire,
	57	quar gran dezir ai
		qu’ieu fos el renc lai
		senes tot cossire
	60	on sanh Peir’estay.