Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 401,005 Auteur: Raimon Gaucelm de Bezers Genre: Chanson religieuse Numero: XLIX

Dieus m'a dada febre tersana dobla

I	1	Dieus m’a dada febre tersana dobla,
		que vol que yeu sia d’elh remembratz;
	3	e pus que·l play, en la primeira cobla
		li pregarai que·m perdo mos peccatz
		e que·m do la sia bevolensa
	6	e que·m garde de far falhensa
		et a la fi m’arma de marrimen,
		qu’en negun loc non sufieira turmen.
II	9	D’aisso prec Dieus senes voluntat dobla,
		quar be·u deg far; tan fort suy turmentatz
		–que no mi val tensos, dansa ni cobla–
	12	qu’a pauc no m’es aquest mons oblidatz;
		mar Jhesucrist me fa suffrensa
		per tal qu’aya d’el sovinensa
	15	e per amor qu’aya remembramen
		si anc lunh temps fi negun fallimen.
III		Quascun iorn vey que aquest segles dobla
	18	e malvestatz, en tortz et en foldatz;
		que quascus homs vol de Dieu far sa cobla
		e sos esquerns e sos malvays dechatz,
	21	e non an de re conoyssensa
		ni lur fa nulla res temensa,
		ans se tenon tot quant es a nïen,
	24	sol que ajon d’aver abastamen.
IV		Et es mout folhs qui sa paraula dobla
		encontra Dieu, e mot malazuratz;
	27	quar selh que·u fa n’auzira mala cobla
		per Jhezucrist lo iorn quez er iutjatz;
		quar Dieus li dira ses fallensa:
	30	«tu yest vengutz en dechazensa,
		qu’ades iras el fuec d’ifern arden
		on ia de mal non auras guerimen».
V	33	Bel senher Dieus, ta fort ma lengua·s dobla
		qu’om no m’enten: tan suy afrevolatz.
		Donc prec a vos qu’entendatz esta cobla:
	36	si anc falhi, prec vos merce m’ajatz;
		merces nays en vos e·y comensa,
		de merce etz frugz e semensa,
	39	per que merce vos queri humilmen:
		donc ajatz la·m, francx reys omnipoten.
VI		Jhezucrist, vostra bevolensa
	42	me datz, si·us platz, que tant m’agensa
		que tot quant es als tenj a nïen,
		e deg o far, tals etz sertanamen.