Appel, Carl. Provenzalische Inedita aus pariser Handschriften. Leipzig: Fues’s Verlag, 1890.

Code: 211,001 Auteur: Guillem de Biars Genre: Canso Numero: LVI

Si quo·l maiestre vai prendre

I	1	Si quo·l maiestre vai prendre
		lo iaspi lai on l'a vist,
		m'a fag tant a ssi atendre
		amors, tro que m'a conquist;
	5	mas per mi er greu conquista
		la bella en cuy m'aten,
		celadamen ni a vista,
		si doncx a merce no·m pren.
II		E s'a merce no·m vol prendre,
	10	quon er? — estai! qu'ieu ai vist
		fort castelh pres per atendre
		e mant pros vassalh conquist. —
		et er per home conquista? —
		oc, qui·l sieu voler aten,
	15	qu'ieu ai ben tal sazon vista
		qu'om servir en grat no pren.
III		Tart cug qu'er la sazos vista,
		pus aitan d'a pas s'i pren,
		qu'ieu aia s'amor conquista
	20	ni·l verai ioy qu'ieu n'aten;
		mas ges breto lur atendre,
		si tot se·n an pauc conquist,
		no·s laysson, per qu'ieu puesc prendre
		eyssample segon qu'ay vist.
IV	25	Quar anc genser no·n fon vista,
		es grans la honors que y pren,
		pueys ai tal valor conquista
		don nulh blasme non aten;
		per que·m fai aissi atendre
	30	e m'a per home conquist,
		que·m pot mielhs a sos ops prendre
		que ren de tot quant a vist.
V		Dieus prec que·l mi lays atendre
		los digz per que m'a conquist,
	35	que·m denh entre sos bratz prendre
		en luec on no sia vist
		mas per nos, qu'ab aital vista
		aurai yeu, s'enaissi·m pren,
		bon'aventura conquista,
	40	qu'en als mon cor no·s aten.
VI		Ben dey de bon cor atendre
		en far tant honrat conquist,
		que·l iorn no pot hom mal prendre
		pus qu'aja·l sieu gent cors vist;
	45	per qu'am mais la sua vista,
		quan sol de bon grat la pren,
		qu'autra don' aver conquista,
		la melhor qu'en pretz s'aten.
VII		Si per servir es conquista
	50	ni nulh servidor aten,
		per Crist, mala l'aurai vista,
		si mon servezi non pren;
		quar, s'ieu podi' ades prendre
		d'autr'amor tan quan n'ai vist,
	55	mais volri'a lieys atendre
		ses far tot autre conquist.
VIII		Dona qu'anc no fos conquista,
		on sens e beutatz s'aten
		e creys pretz e ioys a vista
	60	e tot quant hom en grat pren,
		pus totz bos ayps sabetz prendre,
		et es tant saubut e vist,
		ben degratz merce atendre,
		per tal que tot fos conquist.
IX	65	Quar res no·us pot en mal prendre,
		et es tant saubut e vist,
		no y calia sai atendre
		qu'en vos puesca far conquist.
X		Ses conquista·m faitz atendre,
	70	c'ab vista m'avetz conquist;
		e qui pren, deu laisar prendre,
		can s'aten en so c'ha vist.