Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 461,123 Auteur: Anonyme Genre: Chanson religieuse Numero: LIII

Flors de paradis

I	1	Flors de paradis,
		regina de bon aire:
	3	a vos mi ret clis,
		peneden[s], ses cor vaire,
		forfaitz e mesquis;
	6	preguatz per mi·l salvaire
		que·m giet a bon port
		e·m guart de la mort
	9	d’ifern, don conort
		negus homs non pot traire
		per neguna sort.
II	12	Verges, al meu tort
		vos ai trop ofenduda,
		e penet m’en fort
	15	e requier vostr’ aiuda;
		donatz me conort
		que no sia perduda
	18	m’arma, car cazutz
		soi si la vertutz
		de vos no m’adutz
	21	a port, e·l foc non tuda
		qu’es trop issendutz.
III		Verges, lo sant frugz
	24	que de vos pres naissensa,
		de Dieu dissendutz
		ab vera conoissensa,
	27	nos ha rezemutz
		de mort e de temensa,
		si ben cofessatz
	30	suau et en patz
		ab cor aturatz
		ab vera penedensa
	33	ploram los peccatz.
IV		Verges, cant fo natz
		lo sant filhs del altisme,
	36	vostre cors sagratz
		remas, ses tot sofisme,
		purs e non tacatz,
	39	glorïos e sanctisme,
		ses corrompemen.
		Regina plazen,
	42	prec vos humilmen
		que del mortal abisme
		·m siatz defenden.
V	45	Verges, ab mo sen
		–per ma gran forfaitura–
		soj estat falhen
	48	com fola creatura
		contra·l mandamen
		que·m mostra l’escriptura;
	51	may Dieu Jhesucritz
		prec que·m sia guitz,
		car pels meus meritz
	54	fo d’umanal natura
		e de carn vestitz.
VI		Cant l’angels grazitz
	57	verge·us ac saludada
		et ab plazens ditz
		sa razo·us ac mostrada,
	60	be fon obezitz
		per vos, verges sagrada,
		dizens gent e leu:
	63	‘Vec te que soi ieu
		la sirventa Dieu;
		gracia·m sia donada
	66	segon lo dig tieu’.
VII		Verges, anc corrieu
		ni nulh autre messatie
	69	Dieus mas lo filh sieu
		no mes per nos en gatie,
		don li fals juzieu
	72	mezero·l a carnatge;
		car ab gran tristor
		l’auciro·l trachor.
	75	Mas per nostr’amor
		–cant que li fos salvatie–
		sofri la dolor.
VIII	78	Verges cuy azor,
		dona sancta Maria,
		maire del senhor
	81	que·l mon capdel’ e guia:
		a quest peccador
		qu’es fora de la via
	84	de salvatïo
		acaptaz perdo
		dels peccatz on so,
	87	si que m’arma non sia
		en perditïo.
IX		Verges, be sai co
	90	puesc yeu a vos atendre
		ni per cal razo
		devetz mos precx entendre:
	93	car sel c’al lairo
		perdonet al sant vendre
		fo pels meus peccatz
	96	en vos encarnatz
		et a vos filhs datz,
		don remas ses offendre
	99	la verginitatz.
X		Verges, ma foldatz
		m’a de la via plana
	102	de Dieu trop lunhatz,
		e ma voluntatz vana;
		mas l’autor de patz,
	105	que receup carn humana
		del vostre cors car,
		me do tant a far
	108	que·m puesqu’ emendar,
		e m’arma redre sana
		que·us vuelh comandar.
XI	111	Verges, ses doptar
		et ab ferm’ esperansa
		pot totz hom estar
	114	que ha vostra guisansa;
		donc qui gazanhar
		vol Dieu ni s’amistansa
	117	a vos deu venir;
		car senes falhir
		–si·s vol penedir–
	120	vida ses malanansa
		y pot conquerir.
XII		Verges, obezir
	123	me vulhatz; qu’en gran pena
		soj et en cossir,
		si·l vostre precx no·m mena
	126	a port, et issir
		no·m fay de la cadena
		dels peccatz ades,
	129	si que pueys apres
		Dieus me perdones,
		com fe la Magdalena
	132	que·l lavet los pes.
XIII		Verges, tan m’es pres
		l’enemics que m’agacha,
	135	que tot mon proces
		me destruy e m’empacha;
		si no·m defendes
	138	ab la crotz, cant l’aj facha,
		ja m’agra tot cas
		e vencut e las
	141	e menat el vas,
		qu’en la mortal estacha
		fora ia remas.
XIV	144	Verges, tu es pas
		e sendiers e carrieira
		e pons e compas
	147	e via drechurieira,
		per on menaras
		ab razo vertadieira
	150	los crestïas bos
		al gaug precïos
		del rey glorïos
	153	que se en la cadieira
		sobre totz los tros.
XV		Verges, pueys per nos
	156	tornar de mort a vida
		e per so que fos
		nostra mortz destroida
	159	venc morir sa ios
		Dieus a gran escarnida,
		estela de mar,
	162	maire del lum clar,
		vulhatz acabar
		c’a la destra partida
	165	sïam al jutiar.
XVI		Verges, aiudar
		me vulhatz; qu’en la onda
	168	que·m fa balansar
		jns en la mar preonda
		soy, que amparar
	171	no·m puesc si no m’abonda
		la vostra merces.
		Donc, maire verges,
	174	aquest caitieu pres
		desliuratz, qu’en l’esponda
		de la greu mort es.
XVII	177	Verges, hueymas es
		temps e locx et aizina
		que ieu receupes
	180	esperital metzina
		que de Dieu vengues,
		ab la vertut devina
	183	que·m purgues dels mals
		peccatz criminals,
		e ieu sia tals
	186	que m’arma trobe fina
		·l reys celestials.
XVIII		Verges, mos cabals
	189	tem perdre per non-guarda
		–tan soy vas Dieu fals–
		si la tua regarda
	192	pura com cristals
		no·m val que no·m lays’arda
		m’arma el foc bas
	195	on so li abras
		del fals Sathanas,
		mas que sia la garda
	198	del rey sobiras.
XIX		Verges, can lo pas
		es pauzatz sus en l’ara
	201	e le capelas
		ab l’oracïo cara
		·l te entre sas mas
	204	e·l mostra e·l prepara,
		cre que es vers Dieus,
		glorïos filhs tieus,
	207	que pels fals iuzieus
		receup mort tant amara
		per rezembre·ls sieus.
XX	210	Verges, tan m’es greus
		ma colpa e ma falha
		dels grans peccatz mieus
	213	c’ai fag per ma noalha,
		e·l temps es tan breus,
		qu’ieu ai paor que·m falha
	216	del mati al ser;
		mas de vos esper
		c’ab vostre saber
	219	preguetz Ihesu que·m valha
		pel seu gran poder.
XXI		Verges, vos valer
	222	podetz lay on legista
		non pot pro tener,
		ni negun decretista
	225	no·y pot celar ver,
		bachalier ni sophista;
		ni tor ni castel
	228	no·y val, ni libel,
		ni no·y cap apel,
		can la mortz dur’ e trista
	231	ponh de son clavel.
XXII		Regina del cel
		e de paradis porta,
	234	don lo sant anhel
		que·ls peccatz del mon porta
		nasquet de noel
	237	en terra, don es morta
		nostra mort: per mi
		preguatz de cor fi
	240	Dieu, c’ab sant Marti
		m’arma s’en an estorta
		al iorn de la fi.