Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Code: 217,006 Auteur: Guilhem Figueira Genre: Canso Numero: 5

Pel joi del belh comensamen

I	1	Pel joi del belh comensamen
		D’estiu comensi ma chanso
		E pus, quar amors m’en somo,
		Per vos, domna, qu’am coralmen.
	5	E quar m’avetz dig qu’ieu serai
		Jauzire del joi que tant ai
		Dezirat sufren mal en patz,
		Sui esbauditz e conortatz.
II		Aquel que promet et aten,
	10	Sap dos jois donar en un do,
		L’un joi, quel prometre sap bo,
		E l’autre joi, quan lo don ren
		Adrechamen, si cum s’eschai;
		E pueis lo tenon per verai
	15	E per lial, per que sapchatz
		C’aitals prometres es honratz.
III		Mas selh que se mezeis desmen
		Fazen falsa promessio
		E que torna son oc en no,
	20	Aquelh non cre hom de nien,
		E d’amic enemic s’atrai
		Selh que sa promessa estrai;
		Per qu’en reman plus gualiatz
		L’enguanaire que l’enguanatz.
IV	25	Per queus prec, dona, humilmen,
		Pus mes m’avez en sospeisso
		E donat joi prometen pro,
		Qu’ab pro mi retenhatz breumen
		Ab un autre joi que n’aurai,
	30	Quem durara tan quan viurai;
		Qu’aitan m’es lo jois aprusmatz,
		Cum lo dos m’er plus tost donatz.
V		E pus tuit ben enteiramen,
		Bona dompna, el vostre cors so,
	35	Be sabetz que segon razo
		Lo dons trop atendutz se ven.
		Doncx de re plus nous preyarai,
		Pus sabetz qu’ueimais atendrai
		Tant quant er vostra voluntatz,
	40	Quar totz vostre plazers me platz.
VI		Chanso, entre la melhor gen
		Qu’ieu conosc’ e nulh loc, t’en vai,
		En Proensa, e saludam lai
		De ma part totz los pus prezatz
	45	E part totz mo senh’ En Blacatz.