Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 358,001=248,080a Auteur: Peire Torat , Guiraut Riquier Genre: Deux coblas avec deux tornadas (et réponse) Numero: V

Guiraut Riquier, si be·us es luenh de nos

[Peire Torat]
I		Guiraut Riquier, si be·us es luenh de nos,
		coselh vos quier e donatz lo·m breumens:
		una don'ay amada lonjamens
		bel' <ab> gens huelhs et ab plazens faysos,
	5	que·m ausi e m'esglaya
		e no vol far endreg mi ren que·m playa;
		et yeu fas tot so que vol ni cove,
		e lieys no denha ni vol aver merce.
II		E soy preyatz per autra ad estros,
	10	aytan bela et aytan avinens,
		e vol me far un aital mandamens:
		si laysi leys que m'es de greu respos,
		que s'amor no·m estraya
		per lunha res que hom de mi·l retraya;
	15	ans ditz que·m er plazens en tota re
		si·m lays d'amar l'autra que no·m rete.
III		Dieus prec yeu c'am vos aya
		na Bel Deport que tan fort vos esglaya,
		Guiraut Riquier, e vos preyatz per me,
	20	car desamatz am e non ay nulh be.
IV		D'en Dardasier vos puesc dir una re,
		que fort ama n'Alazaytz e platz me.
[Guiraut Riquier]
V		Sie·us es tan luenh, mos cors es pres de vos,
		en P[eir] Torat, car crezes mot valens
	25	[................................................]
		et anc no·us vi, ans ne soy volontos;
		mays pero co que·m n'aya,
		per negun fag mo saber no s'esmaya,
		ans vos daray coselh segon ma fe
	30	bon e lial e ad honor de me.
VI		So qu'es pus car tenc per pus pressios
		que so c'om pot aver leuieyramens,
		car so que [leu] ven, va leu eysamens;
		per que·us cosselh ans amar en perdos
	35	leys que·us nafra ses playa
		e que·us laysetz de l'autra que·us assaya,
		car prometen vos vol tyrar a se
		non per amor, mays per enjan, so cre.
VII		Tota dona qu'es gaya
	40	vol assayar fin aman ans que·l aya
		esgardamen de far plazer en re;
		mas pueys ne val cinc cens mals traytz un be.
VIII		En P[eir] Torat, mon Bel Deport me te
		ses tot respieg, e per tant no·m recre.