Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,001 Auteur: Bertran de Born Genre: Canso (fragment de deux coblas) Numero: IV

A ! Lemozin, francha terra cortesa

	1'	Bertrans de Born si era drutz de ma domna Maeutz de
		Montaignac, de la moiller de Talairan, que era aitals dom-
		na com eu vos ai dich en la razon de la domna soiseubuda.
		E si com eu vos dis, ela·l parti de si e det li comjat et
	5'	encusava lo de ma domna Guiscarda, de la moiller del ves-
		comte de Comborn, d’una valen domna que fon de Bergoigna,
		sor d’En Guiscart de Beljoc. Avinens domna et enseignada
		era, complida de totas beutatz. Si la lauzava fort en com-
		tan et en chantan. Bertrans, enans qu’el la vis, era sos
	10'	amics per lo ben qu’el auzia d’ella, et enans qu’ella fos
		venguda a marit al vescomte de Comborn. E per alegressa
		qu’el ac de la soa venguda, si fetz aquestas coblas que
		dizion :
I	1	A ! Lemozin, francha terra cortesa,
		Molt me sap bo qar tals honors vos creis,
		Qe jois e prez e deportz e gaiesa,
		Cortesia e solatz e dompneis
	5	S’en ven a nos ; el cor estei anceis !
		Be·s deu gardar qui a druz se depeis
		Per qals obras deu esser dompna qesa.
II		Dos e servirs e garnirs e largesa
		Noiris amors com fai l’aiga los peis,
	10	Enseignamenz e valors e proesa,
		Armas e cortz e guerras e torneis.
		E qui pros es ni de proesa·s feis,
		Mal estara, s’aoras non pareis,
		Pos Na Guiscarda nos es sai tramesa.
		E per aquesta domna Guiscarda, si·l parti de si ma domna
	15'	Maeuz, qu’ella crezia qu’el li volgues meills que ad ella,
		e qu’ella li fezes amor. E per aquest departimen, el fetz
		la domna soiseubuda e·l sirventes que ditz : “Eu m’escondic,
		domna, qe mal non mier ...” etc.