Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,015 Auteur: Bertran de Born Genre: Escondich Numero: VI

Eu m'escondisc, dompna, que mal non mier

I	1	Eu m’escondisc, dompna, que mal non mier
		De so que·us ant dich de mi lausengier.
		Per merce·us prec q’om non puosca mesclar
		Lo vostre cors fin, leial, vertadier,
	5	Humil e franc, cortes e plazentier,
		Ab mi, dompna, per messongas comtar.
II		Al primier get perda eu mon esparvier
		O·l m’aucion el poing falcon lainier
		E porton l’en q’ieu·l lor veia plumar
	10	S’ieu non am mais de vos lo cossirier
		Que de nuill’autra aver mon desirier,
		Qe·m don s’amor ni·m reteigna al colgar.
III		Autr’escondich vos farai plus sobrier
		E no·m puosc plus adorar d’encombrier :
	15	S’ieu anc failli vas vos neis del pensar,
		Qan serem sol dinz cambra o en vergier,
		Failla·m poders davas mon compaignier
		De tal guisa que no·m posca aiudar.
IV		S’ieu per jogar m’asset pres del taulier,
	20	Ja no·i puosca baratar un denier
		Ni ab taula presa non puosca intrar,
		Anz get ades lo reirazar derrier,
		S’ieu autra dompna mais deman ni enquier
		Mas vos cui am e desir e teing car.
V	25	Seigner sia eu de castel parsonier
		Et en la tor siam catre parier
		E ja l’us l’autre non poscam amar,
		Anz m’aion ops totz temps arbalestrier,
		Metge e sirven e gaitas e portier,
	30	S’ieu anc aic cor d’autra dompna amar.
VI		Ma dompna·m lais per autre cavallier
		E pois, non sai a que, m’aia mestier ;
		E failla·m vens qan serai sobre mar.
		En cort de rei mi batan li portier
	35	Et en cocha fassa·l fugir primier,
		Si no·us menti cel qe·us anet comtar.
VII		Dompna, s’ieu ai mon austor anedier
		Bel e mudat, ben prenden e mainier,
		Que tot auzel puosca apoderar,
	40	Sisn’e grua et aigron blanc e nier,
		Volria lo mal mudat, gaillinier,
		Gras, desbaten, que non puosca volar ?
E		Fals, enveios, fementit lausengier,
		Pois ab midonz m’avetz mes destorbier,
	45	Be·us lausera qe·m laissasetz estar.