Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,012 Auteur: Bertran de Born Genre: Canso Numero: VII

Dompna, puois de mi no·us cal

I	1	Dompna, puois de mi no·us cal
		E partit m’avetz de vos
		Senes totas ochaios,
		Non sai on m’enqeira,
	5	Que ja mais
		Non er per mi tant rics jais
		Cobratz ; e si del semblan
		Non trob dona a mon talan
		Qe·m vailla vos q’ai perduda,
	10	Ja mais non vuoill aver druda.
II		Puois no·us puosc trobar engal,
		Que fos tant bella ni pros,
		Ni sos rics cors tant joios,
		De tant bella tieira
	15	Ni tant gais
		Ni sos rics pretz tant verais,
		Irai per tot agaran
		De chascuna un bel semblan
		Per far dompna soiseubuda
	20	Tro vos me siatz renduda.
III		Fresca color natural
		Pren, Bels-Cembelins, de vos
		E·l dolz esgart amoros ;
		E fatz gran sobreira
	25	Car re·i lais,
		Q’anc res de ben no·us sofrais.
		Midonz N’Aelis deman
		Son adreig parlar gaban ;
		Qe·m don a midonz aiuda,
	30	Pois non er fada ni muda.
IV		De Chales la vescomtal
		Vuoill qe·m done ad estros
		La gola e·ls mans amdos.
		Pois tenc ma carrieira,
	35	No·m biais,
		Ves Rocacoart m’eslais
		Als pels N’Agnes qe·m dara·n ;
		Q’Iseuz, la dompna Tristan,
		Que fon per totz mentauguda,
	40	No·ls ac tant bels a saubuda.
V		N’Audiartz, si be·m vol mal,
		Voill qe·m don de sas faissos,
		Qe·il estai gen liazos.
		E car es enteira,
	45	C’anc no·is frais
		S’amors ni·s vols en biais,
		A mon Mieills-de-Ben deman
		Son adreich nou cors prezan,
		De qe par a la veguda
	50	La fassa bon tener nuda.
VI		De Na Faidida atretal
		Voill sas bellas denz en dos,
		L’acuillir e·l gen respos
		Don es presentieira
	55	Dinz son ais.
		Mos Bels-Miraills voill qe·m lais
		Sa gaieza e son garan,
		E car sap son benestan
		Far, don es reconoguda,
	60	E no·is cambia ni·s muda.
VII		Bels-Seigner, eu no·us qier al
		Mas que fos tant cobeitos
		D’aqesta cum sui de vos ;
		C’una lechadeira
	65	Amors nais
		Don mos cors es tant lecais
		Q’am mais de vos lo deman
		Que autra tener baisan.
		Doncs midons per qe·m refuda,
	70	Pois sap que tant l’ai volguda ?
E		Papiol, mon Aziman
		M’anaras dir en chantan
		C’Amors es desconoguda
		Sai e d’aut bas cazeguda.