Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,014 Auteur: Bertran de Born Genre: Sirventes Numero: XII

Ieu chan, que·l reys m'en a preguat

I	1	Ieu chan, que·l reys m’en a preguat,
		A l’auzen del mon menassat
		De l’afar d’aquesta guerra,
		D’aquest juec que vey entaulat ;
	5	E sabrem, quant l’auran joguat,
		Dels quals dels filhs er la terra.
II		Tost l’agra·l Reys Joves matat,
		Si·l coms no·l n’agues essenhat,
		Mas aissi·ls clau e·ls enserra
	10	Qu’Enguolmes a per fort cobrat
		E tot Centonge deliurat
		Tro lai part Finibus-Terra.
III		Si·l coms pot far sa voluntat,
		Que no·l vendon cyst afiat,
	15	Ni del tot si dezenferra.
		Qu’anc cynglar no vim pus irat
		Quan l’an brocat ni l’an cassat
		Qu’elh er ; mai sos cors non l’erra.
IV		De mossenhor lo rey annat,
	20	Conosc que an siey filh peccat,
		Que del sojorn d’Anglaterra
		L’an ahoras dos ans lunhat.
		De totz lo·n tenh per enguanat
		Mai quan de Johan ses Terra.
V	25	Li Guizan si son acordat
		Entre·lhs e ves lui revelat.
		Quon aissilh de Lombardia.
		Mai volon esser be menat
		Per rey que per comte forssat ;
	30	D’aitan lur trac guarentia.
VI		Aquest juec tenc per guazanhat
		Deves nos e per envidat,
		Que dels pezos de Valia
		Avem l’escachier desliurat,
	35	Que tug n’aneron esfredat
		Ses comjat q’us non prendia.
VII		En Lemozi fon comensat,
		Mas de lai lur er afinat.
		Qu’entre Fransa e Normandia,
	40	Ves Giortz e ves Nuoumercat,
		Vuelh qu’en aujon cridar “Arrat !”
		E “Monjoy’ !” e “Deus aïa !”
VIII		Lo sen venserem ab foudat,
		Nos, Lemosin, et envezat,
	45	Que volem qu’om do e ria ;
		Que·l Norman en son enuiat
		E dizon, si·s n’eron tornat,
		Q'uns mais d'elhs sai non venria.
IX		Lo rey tenc per mal cosselhat
	50	De Fransa, e per piegz guizat ;
		Quar vey que sos fagz estanha
		Que li valrion mais daurat ;
		E si no val a son conhat ;
		Sens e pretz tem que·l sofranha.
X	55	Frances, si quon es abdurat
		Sobre totz e li plus prezat,
		Paresca q’us non remanha
		Companh que·l reys aia mandat ;
		Que ja mais no seretz honrat
	60	Si non etz en la mesclanha.
XI		Lo dux de Berguonh’a mandat
		Qu’el nos aiudar’a l’estat
		Ab lo secors de Campanha,
		On venran tal cinc cen armat
	65	Que, quant tug serem aiustat,
		Non er Peitieus no s’en planha.
XII		Reys qui per son dreg si combat
		A mielhs dreg en sa eretat.
		E quar conquerec Espanha
	70	Karles, n’a hom tos tempz parlat.
		Qu’ab trebalh et ab larguetat
		Conquier reys pretz e·l guazanha.
E		Senh’En Rassa, aquest comtat
		Vos cresca·l reys ab Bretanha !
E'	75	Lo Reys Joves s’a pretz donat
		De Burcx troqu’en Alamanha.