Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,021 Auteur: Bertran de Born Genre: Sirventes Numero: XVII

Ges no mi desconort

I	1	Ges no mi desconort,
		S’ieu ai perdut,
		Qu’eu non chant e·m deport
		E no m’aiut
	5	Con cobres Autafort
		Qu’eu ai rendut
		Al seignor de Niort,
		Car l’a volgut.
		E puois e merceian
	10	Li sui vengutz denan,
		E·l coms en perdonan
		M’a retengut baisan ;
		Ges no·i dei aver dan,
		Que qe·m disses antan,
	15	Ni lausengier non blan.
II		Vas mi son perjurat
		Trei palazin
		E·l catre vescomtat
		De Lemozin
	20	E li dui penchenat
		Peiregorzin
		E li trei comte fat
		Engolmezin.
		E·N Sentols ab Gasto
	25	E tut l’autre baro
		Me feron plevizo
		E lo coms de Digo
		Ab lo comte breto
		E Raimons d’Avigno,
	30	Et anc uns no·m tenc pro.
III		Ses pro tener amic
		Tenc per egal
		Com fas mon enemic
		Qui no·m fai mal.
	35	Q’en un mostier antic
		De san Marsal
		Me jureron man ric
		Sobr’un missal.
		Tals me plevi sa fe
	40	Non fezes plag ses me,
		Qu’anc pois no m’en tenc re ;
		E no·ill estet ges be
		Car se mes a merce
		E s’acordet ab se,
	45	So vos pliu per ma fe.
IV		Si·l coms m’es avinens
		E non avars,
		Mout li serai valens
		En sos affars
	50	E fis com us argens,
		Humils e cars.
		E·l coms fassa lo sens
		Que fai la mars :
		Quan res i chai de bo,
	55	Vol que ab lei s’esto,
		E so que no·l te pro
		Gieta fors el sablo.
		Aisi taing de baro
		Que teigna so perdo
	60	E, s’el tol, que pois do.
V		Lo comte voil pregar
		Que ma maiso
		Mi comant a gardar
		O que la·m do ;
	65	C’ades mi son avar
		Tut sist baro,
		C’ab els non puosc estar
		Ses contenso.
		Ara mi pot cobrar
	70	Lo coms ses malestar
		Et ieu vas lui tornar
		Et servir et onrar ;
		E non o volgui far
		Troc’al desamparar
	75	Sui vengutz de N’Aimar.
E		Domna ab cor avar
		De prometr’e de dar,
		Puois no·m volez colgar,
		Donases m’un baisar !
	80	Aissi·m podes ric far
		E mon dan restaurar,
		Si Dieus e saings m’anpar.