Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,020 Auteur: Bertran de Born Genre: Sirventes Numero: XVIII

Ges de sirventes no·m tartz

I	1	Ges de far sirventes no·m tartz,
		Anz lo fauc senes totz affans.
		Tant es sotils mos geins e m’artz
		Que mes m’en sui en tal enans
	5	E sai tant de sort
		Que ve·us m’en estort ;
		Que comte ni rei
		No·m forssan ni grei.
II		E pois lo reis e·l coms Richartz
	10	M’ant perdonat lor maltalans,
		Ja mais N’Azemars ni N’Aichartz
		No·m don tregas ni·N Talairans ;
		Ni ja d’Autafort
		No·il laissarai ort.
	15	Qui·s vol m’en gerrei
		Pois aver lo dei.
III		Quant es fis devas totas partz,
		A mi resta de gerra uns pans.
		Pustella en son huoill qui m’en partz,
	20	Si tot m’o comenssiei enans !
		Patz no·m fai conort,
		Ab gerra m’acort,
		Q’ieu non teing ni crei
		Negun’autra lei.
IV	25	E no·i gart diluns ni dimartz
		Ni setmanas ni mes ni ans,
		Ni·m lais per abril ni per martz
		Q’ieu non tracte cum veigna dans
		A celz qe·m fant tort ;
	30	Mas ja mais per fort
		Non conquerran trei
		Lo pretz d’un correi.
V		Qui que fassa de bos issartz,
		Eu me sui totz temps mes en grans
	35	Cum puosca aver cairels e dartz,
		Elms et aubercs, cavals e brans ;
		C’ab aisso·m conort
		E·m teing a deport
		Assaut e tornei,
	40	Donar e dompnei.
VI		Mos parsoniers es tant gainartz
		Qu’el vol la terra mos enfans ;
		Et eu la·il vuoill dar, tant sui gartz ?
		Pois diran tuich : “Flacs en Bertrans !”
	45	Mas sal tot lo tort,
		Cre q’a malvatz port
		Venra, so·us autrei,
		Anz c’ab mi plaidei.
E		No·m cal d’Autafort
	50	Mais far dreich ni tort,
		Qe·l jutgamen crei
		Mon seignor lo rei.