Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,006a Auteur: Bertran de Born Genre: Planh Numero: XXII

A totz dic qe ja mais non voil

I	1	A totz dic qe ja mais non voil
		Viure, ni ja joi non aurai
		Tan gran con lo jorn q’ieu morrai.
		Pos sai hai mon Rassa perdut,
	5	Lai lo volri’aver cobrat.
		Ai, segner ! Car ses vos remain,
		Totz temps n’aurai lo cor irat
		Duscha que vos aia segut.
II		Lo cors mi remet e li oil
	10	Per l’aiga qi d’aval en vai
		Per la dura dolor q’ieu trai,
		Segner, pos m’agron mentagut
		C’ab se vos avia menat
		Lo Segner cui servon li sain
	15	Cui pregem tuit per sa bontat
		Qe ab se vos guit a salut.
III		Verais coms, Alixandres voil
		Que·us fassa compagnia lai,
		Ogiers e Raols de Canbrai,
	20	Rolantz ab la soa vertut
		Ab Olivier, son vezin, At,
		Estols, Naimes et Oristain,
		Guillems d’Aureng’e·l plus prezat
		Qe del miels del mont son crezut.
IV	25	De Lerida jusq’a Vernoil
		Ni de los Alps a Roncisvai,
		Ni d’outra la mar ni de zai
		Non portav’anc princeps escut,
		Tan s’agues de bon pretz levat ;
	30	Q’em breu non valgra argenz estain
		Tan l’ome n’agran en plantat,
		Qe tornat l’avi’en menut.
V		S’Artus, lo segner de Cardoil,
		Cui Breton atendon e mai,
	35	Agues poder qe tornes sai,
		Breton i aurian perdut
		E Nostre Segner gazagnat.
		Si lor i tornava Galvain,
		Non lur auria esmendat
	40	Qe mais non lur agues tolut.
VI		Sa honor fara, si l’acoil
		En sa cort, qar anc non hac mai
		Tan ric, ni aitan bo no sai,
		Ni tant aia de prez agut,
	45	Qe so dont eron descuiat
		Escïen e sobrier e main,
		El reteni’a doble grat
		D’aqelz qi l’avion vezut.
VII		Prez es jos de l’auzor capdoil
	50	Pel conte qe tenia·l rai,
		E jovenz tornatz en esmai.
		Perdut an lor capdel li drut
		E·il ric torneiador prezat,
		Joglar e soudadier estrain
	55	E donas lo miels ensegnat
		E prestador lo plus crezut.
E		Lo reis dels reis, per sa vertut,
		Retenga lo conte prezat,
		Dont totz lo monz sospir’e plain,
	60	Pos l’autre segle n’a ornat
		Et aqest de sai dechaüt.