Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,045 Auteur: Bertran de Born Genre: Sirventes Numero: XXX

Volontiers fera sirventes

I	1	Volontiers fera sirventes
		S’om ho volgues ausir chantar
		Que pretz es mortz, honors e bes ;
		E si ieu los pogues venjar,
	5	Tanz n’i agra que mortz que pres
		Que, si fins del mon no·i vengues,
		Tanz non pogran aigas negar
		Ni tuit li foc del mon cremar.
II		Si non es tortz ni nesïes
	10	So qu’en chantan m’oez contar ?
		Car Dius dona la rend’e·l ses
		(Qu’el s’en deu ja saber guidar)
		Segon que l’om e l’avers es.
		Mas, ses mesura, non es res :
	15	Aisel que·s vol desmesurar
		No pot sos faitz en aut poiar.
III		Regisme son, mas rei non jes,
		Et contatz, mas non comt ni bar,
		Las marchas son, ma no·l marques,
	20	E·ill ric castell e·ill bel estar,
		Mas li castellan non i so ;
		Et avers es plus c’an no·n fo ;
		Pro an condutz e pauc manjar
		En colpa d’avol ric avar.
IV	25	Bellas personas, bels arnes
		Pot om pro veder e trobar,
		Mas no·i es Augiers lo Danes,
		Berrautz ni Bauduïs no·i par.
		E de pel penzenat son pro,
	30	Rasas denz et en cais greno,
		Mas non ges cel que sapch’amar,
		Cort tener, domneiar ni dar.
V		Ai, flaca gen ! On so·ill cortes
		Que solon castels asejar,
	35	E que solon sesman’e mes
		Cort mantener ab gen reingnar
		E que solon donar rics dos
		E far las autras mesios
		A soudadier et a guglar ?
	40	Un sol o·n vei ? So autz contar !
VI		Si·l reis Felips, reis dels Frances
		A volgut a Richart donar
		Gisort, aut loc ez aut paes,
		Richartz l’en deu fort merceiar,
	45	Mai si Felips del mieu cor fos,
		Richartz no mouria·ls talos
		A son dan senes encontrar.
		E puois no·l vol, lais s’en ferrar !
E		Papiol, sias tan cochos,
	50	Di·m En Richart qu’il es leos.
		E·l reis Felips agnel me par
		Qu’aisi·s laissa desiritar.