Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,003 Auteur: Bertran de Born Genre: Sirventes Numero: XXXI

Anc no·s poc far maior anta

I	1	Anc no·s poc far maior anta
		Qan m’asols
		Ni mi pres en dols.
		E pueis ill so a enqest
	5	Midons ni·l plai qe m’esclava
		Ni qe·m lais,
		No m’es danz
		Si·lls autruis enfanz
		Colc’el mieu bressol
	10	Q’ieu sui granz.
II		Fatz cors, e pos ill t’encanta,
		Tu t’o cols !
		E fatz i qe fols,
		Que de tot joi si devest
	15	E de pretz si cura e lava.
		Per ja mais
		Le bobanz
		Remainha e·l mazanz,
		Q’ieu o vueilh, si·s vol,
	20	Dos aitanz.
III		Le seinher de cui es Manta
		E Murols
		S’es de prim tersols
		Tornatz. Ab qe sai non rest !
	25	Sieus seria, si·s n’anava
		Lai, Roais,
		Trevaganz,
		Alaps e Aranz
		E fera filhol
	30	Dels Persanz.
IV		Vas mon Oc-e-No t’avanta,
		Papiols
		Qar sieus es Bristols
		E Nortzecrentz e Suest
	35	E Londres e Titagrava
		E Carais
		E Roanz
		E Toars e Canz.
		Pos tot ha qan vol,
	40	Sai s’eslanz.
V		Entre Dordoinha e Charanta
		Es trop mols
		So·m dis N’Auriols,
		Q’enqier no·i a ren conqest.
	45	Et er l’anta si·s suava
		Ni qe lais
		Benananz
		E gortz e tiranz
		Cels q’amar non sol
	50	E poissanz.
VI		Enaps e copas mazanta
		E orçols
		d’argen e pairols
		E sec ribiera e forest,
	55	E sai tolli’e donava !
		No·s biais
		Dels afanz :
		Preisas e mazanz,
		Gerras ab tribol
	60	L’er ennanz.
E		Bells-Seinher, truanz
		Seres, si no·us dol
		Le mieus danz.
E'		Mariniers, enjanz
	65	Es q’amar destol
		Als amanz.