Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,005 Auteur: Bertran de Born Genre: Sirventes Numero: XXXVI

Ar ven la coindeta sazos

I	1	Ar ven la coindeta sazos
		Que aribaran nostras naus,
		E venra·l reis gaillartz e pros,
		C’anc lo reis Richartz non fo taus.
	5	Adoncs veirem aur et argen despendre,
		Peirieiras far destrapar e destendre,
		Murs esfondrar, tors baissar e dissendre
		E·ls enemics encadenar e prendre.
II		Ges no·m platz de nostres baros
	10	Q’ant faitz sagramens non sai caus ;
		Per so n’estaran vergoignos
		Cum lo lops q’al latz es enclaus
		Qand nostre reis poira mest nos atendre ;
		Q’estiers nuills d’els non s’en poira defendre,
	15	Anz dirant tuich : “Mi non pot hom mesprendre
		De nuill mal plaich, anz mi vuoil a vos rendre.”
III		Bella m’es preissa de blessos
		Cubertz de teins e blancs e blaus,
		D’entresseins e de gonfanos
	20	De diversas colors tretaus,
		Tendas e traps e rics pavaillons tendre,
		Lanssas frassar, escutz traucar e fendre
		Elmes brunitz e colps donar e prendre
		. . . . . . . . . . . . . . . . . . . . . . . . . .
IV	25	No·m platz compaigna de basclos
		Ni de las putanas venaus.
		Sacs d’esterlins e de moutos,
		M’es laitz, qand son vengut de fraus.
		E mainadier escars deuria hom pendre
	30	E ric homen, can son donar vol vendre.
		En dompn’escarsa no·is deuria hom entendre
		Que per aver pot plegar e destendre.
V		Bo·m sap l’usatges q’a·l leos
		Q’a ren vencuda non es maus,
	35	Mas contr’orgoill es orgoillos.
		E·l reis non a baros aitaus,
		Anz, qan vezon que sos affars es mendre,
		Poigna chascus cossi·l puosca mesprendre.
		E no·us cujetz qu’eu fassa motz a vendre,
		Mas per ric bar deu hom tot jorn contendre.