Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,007 Auteur: Bertran de Born Genre: Sirventes Numero: XXXVIII

Belh m'es quan vey camjar lo senhoratge

I	1	Belh m’es quan vey camjar lo senhoratge
		E·lh vielh laixan als joves lur maizos,
		e quascus pot giquir a son linhatge
		Aitans d’efans que l’us puesc’esser pros.
	5	Ladoncs m’es vis que·l segle renovelh
		Mielhs que per flor ni per chantar d’auzelh.
		E qui dona ni senhor pot camjar
		Vielh per jove, ben deu renovelar.
II		Vielha la tenc dona, pus capel atge
	10	Et es vielha, quan cavalier non a.
		Vielha la tenc, si de dos drutz s’apatge
		Et es vielha, si avols hom lo·il fa.
		Vielha la tenc s’ama dins son castelh
		Ez es vieilha, mas ha ops de fachell.
	15	Vieilha la tenc, pos l’enuieion juglar
		Et es vielha, que trop vuelha parlar.
III		Jov’es dona que sap honrar paratge
		Et es joves per bos fagz, quan los fa.
		Joves se te, quan a adreg coratge
	20	E vas bon pretz avol mestier non a.
		Joves se te, quan guarda son cors belh
		Et es joves dona, quan be·s capdelh.
		Joves se te, quan no·y cal devinar,
		Qu’ab belh jovent se guart de malestar.
IV	25	Joves es hom que lo sieu ben enguatge
		Et es joves, quan es ben sofraitos.
		Joves se te, quan pro·l costa ostatge
		Et es joves, quan fa estraguatz dos.
		Joves se te, quan art l’arqua e·l vaixelh
	30	E fai estorn e vouta e sembelh.
		Joves se te, quan li plai domneyar
		Et es joves, quan ben l’aman juglar.
V		Vielhs es ricx hom, quan re no met en gatge
		E li sobra blatz e vis e bacos.
	35	Per vielh lo tenc, quan liura huous e fromatge
		A jorn carnal si e sos companhos ;
		Per vielh, quan viest capa sobre mantelh
		E vielh, si a caval qu’om sieu apelh.
		Per vielh lo tenc, quan no·l plai domneyar
	40	E vielh, si pot guandir ses baratar.
E		Mon sirventesc port de vielh e novelh
		Arnautz juglars a Richart, que·l capdelh ;
		E ja thezaur vielh no vuelh’amassar,
		Qu’ab thezaur jove pot pretz guazanhar.