Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 284,001 Auteur: Bertran de Born Genre: Sirventes Numero: XLa

Er ai ieu tendut mon trabuc

I	1	Er ai ieu tendut mon trabuc
		Don sueilh trair’als malvas baros ;
		E trairay n’a un de cor blos,
		Vueig d’onor, plen de nuailha,
	5	Lauzengier, bausador, janglos,
		Avar ric croy, vueig de fatz bos,
		Plen d’enjan, vil en batailha.
II		Malvas es dels pes trosq’al çuc
		E flacs del cap trosq’als talos,
	10	E sos conseils es de garsos,
		Sa cortz de paupra vitailha,
		Sos solatz pesanz e iros,
		E sei don paupr’e sofrachos,
		Sei fach van con fuecs de pailha.
III	15	Als enemics son sei hueilh cluc,
		E contra·ls amics ve d’amdos
		Per far enjans e tracïos.
		E per tan no tem far failha,
		Qu’el ditz, e no·n es vergoinhos,
	20	Qe sos parenz fo Ganeilhos :
		Per o, no·il cal q’el trasailha.
IV		Anc als enemics no fes truc
		Qe no·i laises sos compainhos
		E·ls cavals e las garnisos.
	25	E fa mal qan porta mailha
		Ni armas, mas los esperos,
		Que mais l’an valgut a sasos
		Qe lança ni branz qe tailha.
V		Al baro plus cau d’un saüc,
	30	Sirventes, vai tost e cochos ;
		E no sia en luec tan rescos
		Qe tu as auta sonailha
		No·l digas : “Ieu vieinh çai a vos !”
		Pero lai vay a reculos
	35	Q’enaissi tainh c’om l’asailha.