Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,024 Auteur: Bertran de Born Genre: Sirventes (Sirventes joglaresc) Numero: XL

Mailolin, joglar malastruc

I	1	Mailolin, joglar malastruc,
		Pos acoindat m’a hom de vos
		E mi venes qerre chansos,
		En talent ai q’ie·us en vailha.
	5	Qar iest avols e semblas bos,
		Mieills fora foses campios
		Qe viure d’autrui curailha.
II		Aital solatz m’aves faissuc
		Qu’autr’om en seria enuios ;
	10	Ez es plus nescis qe montos,
		E canta plus clar li grailha.
		Porc q’om regarda millargos
		Fai meilhor escoutar qe vos,
		O nafrat qan hom lo tailha.
III	15	Qi·us apellava paoruc,
		Semblaria qe vers no fos :
		Qar iest granz e joves e tos,
		Fas semblan q’aias corailha,
		Mai lai on lebres es leos,
	20	Vos est volpils e nuailhos,
		Flacs, ses tota defensailha.
IV		Dedintz iest plus caus d’un saüc,
		Ez a·s maior cor uns soiros,
		Mas le feges et le polmos
	25	Es grans sotz la cabeçailha.
		Ez iest de matin someilhos,
		Qe, qi·us sona un mot o dos,
		Fas semblan qe no·s en cailha.
V		Mal vos tenen per asertuc
	30	D’armas en la ost dels basclos,
		Qe un non hi a dels garços
		Qe denan vos non assailha.
		Si·s defendian ab melos,
		Cascus intrer’i anz qe vos,
	35	S’avias elm e ventailha.
VI		. . . . . . . . . . . . . . . . . . . . . . . .
		Lai on sentes raustir montos
		Vos fas de l’intrar plus cochos
		Q’al pal ni a la serrailha.
	40	E non es tan grans le roinhos
		Q’en un sol morsell o en dos
		Non l’enpasses, qi·l vos tailha.
VII		. . . . . . . . . . . . . . . . . . . . . . . .
		Raimons de Planell, qar es pros,
	45	Vueilh q’auja·l sirventes de vos ;
		E·l sons iesca·n ab trebailha ;
		Car sordei chantatz qe paos
		E gavainhatz los motz e·ls sos,
		Per q’es fols qi los vos bailha.