Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 070,037 Auteur: Bernart de Ventadorn Genre: Canso Numero: IX

Can la frej'aura venta

		[CANÇÓ]
I	1	Can la frej’aura venta
		deves vostre pais,
		vejaire m’es qu’eu senta
		un ven de paradis
	5	per amor de la genta
		vas cui eu sui aclis,
		on ai meza m’ententa
		e mo coratg’assis;
		car de totas partis
	10	per leis, tan m’atalenta!
II		Sol lo be que·m prezenta,
		sos bels olhs e·l francs vis,
		que ja plus no·m cossenta,
		me deu aver conquis.
	15	No sai per que·us en menta,
		car de re no·n sui fis;
		mas greu m’es que·m repenta,
		que[d] una vetz me dis
		que pros om s’afortis
	20	e malvatz s’espaventa.
III		De domnas m’es vejaire
		que gran falhimen fan
		per so car no son gaire
		amat li fin aman.
	25	Eu no·n dei ges retraire
		mas so qu’elas volran,
		mas greu m’es c’us trichaire
		a d’amor, ab enjan,
		o plus o atretan
	30	com cel qu’es fis amaire.
IV		Domna, que cujatz faire
		de me que vos am tan,
		c’aissi·m vezetz mal traire
		e morir de talan?
	35	Ai! francha de bon aire,
		fezetz m’un bel semblan,
		tal don mos cors s’esclaire,
		que mout trac gran afan,
		e no·i dei aver dan,
	40	car no m’en posc estraire.
V		Si no fos gens vilana
		e lauzenger savai,
		eu agr’amor certana;
		mas so [en reire·m trai].
	45	De solatz m’es umana
		can locs es ni s’eschai,
		per qu’eu sia c’a sotzmana
		n’aurai encara mai,
		c’«astrucs sojorn’e jai
	50	e malastrucs s’afana».
VI		Cel sui que no soana
		lo be que Deus li fai:
		qu’en aquella setmana
		can eu parti de lai,
	55	me dis en razo plana
		que mos chantars li plai.
		Tot’arma crestiana
		volgra agues tal jai
		com eu agui et ai,
	60	car sol d’aitan se vana.
VII		Si d’aisso m’essertana,
		d’autra vetz la·n creirai;
		o si que no, ja mai
		no creirai crestiana.
		(Text d’Appel)