Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 226,007=248,041 Auteur: Guillem de Mur , Guiraut Riquier Genre: Tenso (Partimen) Numero: XII

Guiraut Riquier, pus qu'es sabens

I		Guiraut Riquier, pus qu'es sabens	[Guilhem]
		pro a laus de vostres vezis,
		diatz cal deu esser pus fis
		vas bon pretz de dos entendens:
	5	l'us a·ls fatz ses malenansa
		d'amor, la bon'esperansa
		en a l'autre; e diatz ses falhir
		cals fa ni deu mielhs son pretz enantir.
II		Guilhem, sel qu'es de joy manens	[Guiraut]
	10	e l’a per sa valor conquis,
		deu esser vas pretz pus aclis
		que selh qu'esper, car pensamens
		ab dezir li tol esmansa
		de far bos fas d'agradan<s>a,
	15	qu'en l'esperar ten del tot son cossir,
		e·l jauzens deu en totz fatz avenir.
III		Guirautz, autr'es entendemens	[Guilhem]
		a l'entendedor, so m'es vis,
		que cascus val mais cant languis
	20	per amor, que cant n'es jauzens;
		car Amors, on mais s'enansa
		as fatz, pus torn'en mermansa
		l'amans vas precx, c'adoncx moro·l dezir
		e·l fag, per c'om lo solia grazir.
IV	25	Guilhem, vostre razonamens	[Guiraut]
		es fals e frevols e mesquis,
		mais no·us notz c'anc mais no falhis.
		E cals homs languitz, malsabens,
		a de bos faitz remenbransa,
	30	ni cal gay pretz desenansa?
		Vos non avetz d'amor joy ni martir,
		car pretz mandatz abayssar per jauzir.
V		Guiraut, be·us falh tot vostres sens;	[Guilhem]
		veyatz cals es d'amor la fis,
	35	com l'us e l'autre n'escarnis
		can dels fatz fan acordamens.
		Lo rossinhol per semblansa
		·us don que vieu ab alegransa
		tant cant ponha en sa par covertir,
	40	pueys son dos chant torn’en aspre rugir.
VI		Guilhem, on mais parlatz, val mens	[Guiraut]
		vostre razonamen frachis;
		c'auzel non a ni joi ni ris,
		mas volers leugiers e volvens,
	45	e no·s ne pot comparansa
		far ab veray'amistansa
		d'amic lial, que sap son joy culhir
		et on mays n'a, mielhs sap ben far e dir.
VII		Guiraut, sos dos desenansa	[Guilhem]
	50	aital malvad'amistansa,
		com vos dizetz, e·ls fatz lag escarnir,
		e Dieus e·ls sans lo·n meton en azir.
VIII		Guilhem, pus per malenansa	[Guiraut]
		valetz mays, tostemps pezansa
	55	vos done Dieu et a mi don jauzir,
		c'ap joy say mielhs en totz fatz avenir.