Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 029,014 Auteur: Arnaut Daniel Genre: Canso (Sestina) Numero: XXII

Lo ferm voler qu'el cor m'intra

		[SEXTINA*]
I	1	Lo ferm voler qu’el cor m’intra
		no·m pot jes becs escoissendre ni ongla
		de lausengier, qui pert per mal dir s’arma;
		e car non l’aus batr’ab ram ni ab verga,
	5	sivals, a frau, lai on non aurai oncle,
		jauzirai joi, en vergier o dinz cambra.
II		Quan mi soven de la cambra,
		on a mon dan sai que nuills hom non intra,
		anz me son tuich plus que fraire ni oncle,
	10	non ai membre no·m fremisca ni ongla,
		assi cum fai l’enfas denant la verga:
		tal paor ai no·l sia prop de l’arma.
III		Del cor li fos, non de l’arma,
		e cossentis m’a celat dinz sa cambra!
	15	que plus mi nafra·l cor que colps de verga,
		car lo sieus sers lai on ill es non intra:
		totz temps serai ab lieis cum carns et ongla
		e non creirai chastic d’amic ni d’oncle.
IV		Anc la seror de mon oncle
	20	non amei plus ni tant, per aquest’arma!
		c’aitant vezis cum es lo detz de l’ongla,
		s’a lei plagues, volgr’esser de sa cambra:
		de mi pot far l’amors qu’inz el cor m’intra
		mieills a son vol c’om fortz de frevol verga.
V	25	Pois flori la seca verga
		ni de N’Adam mogron nebot ni oncle,
		tant fina amors cum cella qu’el cor m’intra
		non cuig fos anc en cors non eis en arma;
		on qu’ill estei, fors en plaza o dinz cambra,
	30	mos cors no·is part de lieis tant cum ten l’ongla.
VI		C’aissi s’enpren e s’enongla
		mos cors en lei cum l’escorssa en la verga;
		qu’ill m’es de joi tors e palaitz e cambra,
		e non am tant fraire, paren ni oncle;
	35	qu’en paradis n’aura doble joi m’arma
		si ja nuill hom per ben amar lai intra.
VII		Arnautz tramet sa chansson d’ongla e d’oncle,
		a grat de lieis que de sa verg’a l’arma,
		son Desirat, cui pretz en cambra intra.
		(Text de Canello)