Serra-Baldó, Alfons. Els trobadors. Barcelona: Barcino, 1934 (2a ed. 1998).

Code: 213,005 Auteur: Guillem de Cabestaing Genre: Canso Numero: XXVII

Lo dous cossire

		[CANÇÓ]
I	1	Lo dous cossire
		que·m don’Amors soven,
		dona·m fai dire
		de vos maynh ver plazen.
	5	Pessan remire
		vostre cors car e gen,
		cuy ieu dezire
		mais que no fas parven.
		E si tot me desley
	10	per vos, ges no·us abney,
		qu’ades vas vos sopley
		ab fina benvolensa.
		Dompn’en cuy beutatz gensa,
		mayntas vetz oblit mey,
	15	qu’ieu lau vos e mercey.
II		Totz temps m’azire
		l’amors que·us mi defen
		s’ieu ja·l cor vire
		ves autr’entendemen.
	20	Tout m’avetz rire
		e donat pessamen:
		pus greu martire
		nulhs hom de mi no sen;
		quar vos qu’ieu plus envey
	25	d’autra qu’el mon estey
		desautorc e mescrey
		e dezam en parvensa:
		tot quan fas per temensa
		devetz em bona fey
	30	penre, neus quan no·us vey.
III		En sovinensa
		tenc la car’e·l dous ris,
		vostra valensa
		e·l belh cors blanc e lis;
	35	s’ieu per crezensa
		estes vas Dieu tan fis,
		vius ses falhensa
		intrer’em paradis;
		qu’ayssi·m suy, ses totz cutz,
	40	de cor a vos rendutz
		qu’autra joy no m’adutz:
		qu’una non porta benda
		qu’ieu·n pezes per esmenda
		jazer ni fos sos drutz,
	45	per las vostras salutz.
IV		Tot jorn m’agensa·
		l desirs, tan m’abelhis.
		la captenensa
		de vos cuy suy aclis.
	50	Be·m par que·m vensa
		vostr’amors, qu’ans qu’ie·us vis
		fo m’entendensa
		que·us ames e·us servis;
		qu’ayssi suy remazutz
	55	sols, senes totz ajutz
		ab vos, e n’ai perdutz
		mayns dos: qui·s vuelha·ls prenda!
		Qu’a mi platz mais qu’atenda,
		ses totz covens saubutz,
	60	vos don m’es jois vengutz.
V		Ans que s’ensenda
		sobre·l cor la dolors,
		merces dissenda
		en vos, don’, et Amors:
	65	joys vos mi renda
		e·m luenh sospir e plors,
		no·us mi defenda
		paratge ni ricors;
		qu’oblidatz m’es totz bes
	70	s’ab vos no·m val merces.
		Ai, bella doussa res,
		molt fora grans franqueza
		s’al prim que·us ayc enqueza
		m’amassetz, o non ges,
	75	qu’eras no sai cum s’es.
VI		Non truep contenda
		contra vostras valors;
		merces vo·n prenda
		tals qu’a vos si’honors.
	80	Ja no m’entenda
		Dieus mest sos preyadors
		s’ieu vuelh la renda
		dels quatre reys majors
		perqu’ab vos no·m valgues
	85	merces e bona fes;
		quar partir no·m puesc ges
		de vos, en cuy s’es meza
		m’amors, e si fos preza
		em baizan, ni·us plagues,
	90	ja no volgra·m solses.
VII		Anc res qu’a vos plagues,
		franca dompn’e corteza,
		no m’estet tan defeza
		qu’ieu ans non la fezes
	95	que d’als me sovengues.
VIII		En Raimon, la belheza
		e·l bes qu’en midons es
		m’a gen lassat e pres.
		(Text de Långfors)